Shillong, K’lyngkot, 23: Uwei u briew uba la 34 snem ka rta (ïa uba la buhrieh noh ka kyrteng) u la shah kem ha ki Pulit halor ka jingkynnoh ba u dei uba donkti ban kawang petrol bom ïa kawei ka ïing shongwai ha ka dong Chinapati kaba don ha ka shnong Malki, Shillong.
Katkum ka jingïathuh u Rangbah Dong ka Chinapani u Bah Dilip Thabah ka jingjia ka la jia ha ka sngi Palei ha ka por kumba 6 baje janmiet.
“Nga pynrem jur halor kane ka jingjia bad ladep ban pyntip ruh sha ki Pulit bad mynta ki dang pynlong ïa ka jingtohkit,” u la ong bad bynrap ba kum u Rangbah Dong u la bthah ïa ki trai iing ba ki dei ban da bishar bha haba ki ai wai iing ïano ïano hapoh ka dong khnang ba kan ym buh jingeh ïa ka Dorbar Shnong.
Ha kane ka jingjia, ka jingkhangbah jong ka iing ka la iing khong na ki bynta kiba shapoh bad lai tylli ki iit jong ka jingkhang iit ruh ki la pait.
Na ka liang ki trai iing ki la kyntait ruh ban kren eiei halor kane ka jingjia bad u nonglum khubor ka Batesi Tv.
U Superintendent of Police ka East Khasi Hills District u Bah Vivek Syiem u la ïathuh ba u briew uba donkti u dei hi uba sah ha ka shnong Malki bad u la pyntip ba kane ka jingjia ka la jia tang namar ka jingïadon daw shimet.
