Shillong, K’lyngkot, 27: U Symbud Myntri Rangbah ka Jylla uba khmih ïa ka tnat Kam Pohiing u Bah Prestone Tynsong u la pynshai ba ka Sorkar Jylla kam shym la buh sharud ïa ka Meghalaya Residents Safety and Security Act (MRSSA) bad ïathuh ruh ba ka Sorkar Jylla ka la pyntreikam pura ïa kane ka aiñ haduh mynta.
Ha ka jingïakren bad ki lad pathai khubor ha ka sngi Baar u la ong, “mano ba ong ïa phi ba ngi buh sharud ïa ka MRSSA. Ka MRSSA ka la treikam pura bad ngi la don ruh ïa ki District Task Force (DTF) ba la khlieh da ki Deputy Commissioner. Ngi la pyntreikam ïa ki kyndon katkum ka Rule jong ka Aiñ. Ngi la pyntreikam pura ha baroh ki district bad khamtam ha nongbah Shillong.”
Haba kylli, u la ong, “namar ka jingbym don ki kyndon ha ka MRSSA, 2016 ban pynieng ïa ki Entry bad Exit Point dei na kata ka daw ba ngim shym la lah ban pyntreikam pura ïa kane ka aiñ namarba kim don ki kyndon.”
“Namarba kam don ka kyndon (ban pynieng ïa ki Entry bad Exit Point) ngi la wanrah ïa ka jingpynbeit thymmai ïa ka aiñ bad ïa ka Amendment Bill la phah hi da u Lat ka Jylla sha ka Ministry of Home Affairs,” la ïathuh u Bah Tynsong.
U la ïathuh ruh ba ïa ka aiñ The Immigration and Foreigners Act, 2025 kaba la treikam ha baroh kawei ka ri India naduh ka 1 tarik, Nailur, 2025, ka Sorkar Jylla ka la bishar bniah bad mynta ka dang phah sha u Advocate General la ka long neem kaba lah ban pynrung ïa ki kyndon kiba ïasyriem kum ki kyndon jong ka Inner Line Permit (ILP).
