Shillong, K’lyngkot, 31: U Dolloi ka Elaka Stapator u Bah Daman Lakashiang u la ong ba ka Elaka kam pat ai ïa kano kano ka No Object Certificate sha ka National Buildings Construction Corporation Limited namarba ka dang pyrshang ban don ka jingsngewthuh bad ki nongrep kiba shah ktah na ka jingker sainar ha khappud.
Ha ka jingïakren bad ki lad pathai khubor hadien ba la wai ka Executive Committee jong ka Elaka kaba la long ha ka 31 tarik Kyllalyngkot, 2026 ba la ïashim bynta da ki 30 ngut ki waheh shnong ryngkat ki nongkitkam shnong nalor ki riew rangbah jong ka Elaka.
Ka jinglum ïa kane ka jingïalang ka long hadien ba la mih ki kynrum kynram halor ka jingker sainar ha khappud bad ka ri Bangladesh ha kaba ka la don ruh ka jingkynnoh ba u Dolloi ka Elaka Satpator ula kam trai ïa ki jaka puta kiba la long trai da ki paidbah bad la kynnoh ruh ba u la ai jingbit ïa ka sorkar lyngba ka ophis jong u Deputy Commissioner khnang ka National Buildings Construction Corporation Limited kan ïaid noh shakhmat ban shna ïa ka surok ka ban plie lad ïa ka jingtrei ban ker ïa u sainar shiah ha khappud.
Haba pynshai sha ki paid ka Elaka halor ka jingkynthoh jong ki katto katne ki nongrep bad ki Waheh Shnong ba kim ïoh jingtip halor ka jingthmu jong ka Sorkar ban shna ïa ka surok, u Dolloi ula ong ba ki Waheh Shnong da lade hi don lang ha ki katto katne ki jingïalang ryngkat ki ophisar na ka ophis u Deputy Commissioner kumjuh ruh ki Waheh Shnong jong ki phra tylli ki shnong kiba shah ktah ki la leit jurip ryngkat ki ophisar jong ka Sorkar kynthup ruh u Dolloi.
Halor ka jinglongtrai ka Elaka ïa ka khlaw thang rngaw, u Dolloi ula pynshai ba naduh ki por u longshwa manshwa, ïa ka khlaw thang rngaw bad ka jaka la pynïaid da ka Elaka ha ryngkat u Dolloi kum u khlieh ka Elaka.
Halor ka jingdawa ba u Dolloi u dei ban weng noh ïa ka jinglong trai ïa ka khlaw, ka Elaka Satpator, ka la ong ba ka ieng skhem ha ka nongrim ba dei ban pynneh ïa ka riti dustur jong ka Elaka, kata ka khyndew kan neh kan sah jong ka Elaka, katba ki mar rep kin dei jong ki paid nongrep.
