Shillong, Rymphang, 02: Ka President jong ka Meghalaya ASHA Worker Union (MAWU) ka Kong Mira June Myrsing ha ka Lah Sngi u Blei ka la ong ba ka pisa T. 4,82,65 klur jong ki ASHA kaba ki dei ban ïoh ka dang sahkut ha ka tnat ka Koit ka Khiah ïa kaba kim pat ïoh satia.
Ka Kong Myrsing ka la pynpaw ïa kane hadien ba u Myntri ka tnat ka Koit ka Khiah ka Sorkar Jylla u Bah Wailadmiki Shylla dang shen u la ong ba ka Sorkar Jylla ka ladep pyllait ïa ka jingsiew ba ka jingduna ka dei na ka liang jong ki ASHA ym na ka tnat ka Koit ka Khiah.
Ha ka jingkren bad ki lad pathai khubor, ka la ïathuh ruh ba ka jingpynsangeh noh jong ka Union ïa ka jingsangeh treikam ba khlem pud sngi ka long hadien ka jingïakren bad u Mission Director ka National Health Mission (NHM) ha kaba u la kular ban pyllait noh ïa ka pisa kaba dei ka hok jong ki ASHA bad pynbeit ïa ki jingduna na ka liang jong ka tnat ka Koit ka Khiah bad ki ASHA.
Kum ban shu pynkynmaw ki ASHA ki la sangeh treikam haduh 20 sngi ha baroh kawei ka jylla Meghalaya kaba la sdang naduh ka 8 tarik, Kyllalyngkot 2026.
Ka la kren ruh da kaba shai ba ki ASHA ki kwah ban tip bniah ha kaba ïadei bad kita ki jingsiew kiba dang sah ki dei na ka daw ba ki ASHA kim shim lane ki don da kiwei pat ki daw.
“Hynrei na ka liang jong ka MAWU ka lap ba ki jingsiew jong ki ASHA ki dang sahteng haduh T. 4, 82, 65 klur katba na ka liang jong u Bah Wailadmiki u la ong ba ladep ban siew dep hynrei ha kaba ïadei bad ka tnad ka Koit ka Khiah la ïoh jingtip ba ka pisa ka dang sah,” ka la ong.
