Shillong, K’lyngkot, 07: U District Magistrate ka East Jaiñtia Hills District u Manish Kumar ha ka sngi Saitjaiñ u la pynmih da ka hukum kaba khang shi syndon ïa ka jingtih dewiong beaiñ hapoh u pud u sam jong ka shnong Thangsko hadien ba la jia ka jingïap ki nongbylla tih dewiong kaba la kynjoh 27 ngut kat haduh mynta na ka jingbthei u bom dynamite hapoh ka krem tih dewiong beaiñ ha ka 5 tarik mynta u bnai ha ka por kumba 11 baje mynstep.
Da kaba pyntreikam ïa ka iktiar ba la pynkupbor hapoh ka Section 163 ka Bharatiya Nagarik Suraksha Sanhita, u District Magistrate u la mana tyngeh ban ïalum briew palat san ngut shaneng ha ki bynta jong ki krem tih dewiong beaiñ kiba don hapoh ka shnong Thangsko lait noh tang ki bor Sorkar bad ki bor pahara kiba don ha ka kamram.
U District Magistrate u la bthah ruh ïa baroh ki Magistrates kiba la shah pynkhamti ïa ka kamram kin long kiba peitngor bha bad kin pynlong ruh ïa ki jingjurip ha kylleng ki bynta jong ka Thangsko, kin kurup ïa ki kali, ïa ki mashin, ïa ki tiar ki tar ba la pyndonkam ha kaba tih dewiong beaiñ bad ban pyntreikam ruh ïa ki kyndon aiñ pyrshah ïa kito kiba donkti ha ki kam beaiñ kynthup ïa ki kyndon jong ka Mines and Minerals (Development and Regulation) Act bad kiwei kiwei ki Rule kiba ïadei bad kane ka aiñ.
U la bthah ruh ïa ki Magistrates da ka jingïarap jong ki Pulit, kin ithuh, kin thwet bad kin kem ïa ki trai par, ki nongpyntrei, ki nongbei pisa bad ïa ki briew kiba donkti ha ki kam tih dewiong beaiñ bad ban kurup ruh ïa baroh ki tiar ki tiar kiba don jingïadei bad kine ki jait kam be-aiñ.
Shuh shuh u District Magistrate u la maham ruh ba kino kino kiba pynkhein ïa kane ka hukum kin ngat ha ki jingshah pynshitom katkum ki kyndon jong ka aiñ.
Namar ka jingkyrkieh jong ka kam, kane ka hukum kan treikam noh mardor tad haduh ban da pynbna da kumwei pat, la pyntip u District Magistrate ka East Jaiñtia Hills District.
