Shillong, Rymphang, 12: Ka Nationalist Congress Party ka la rai ban ym ai tiket ïa kino kino ki jaidbynriew ki bym ki riewlum Garo ha ka elekshon sha ka Garo Hills Autonomous District Council ka ban sa long.
Ïa kane la pyntip da u Dapkupar Nongrum uba dei u State President jong ka NCP Meghalaya Unit ha ka jingïakren bad ki lad pathai khubor ha ka sngi Balang hadien ba la wai ka jingïalang kaba la long ha nongbah Shillong.
Ha kane ka jingïalang, ka NCP ka la pynbna ruh ïa ki kyrteng jong ki kyrtong ki ban ïakhun ïa ka elekshon sha ka GHADC. Ki kyrteng jong ki kyrtong ki long Nikijrang A. Sangma na Selsiggre/Silkigre, u Senggarm K. Sangma na Siju, u Matgrik K. Sangma na Jengjal, Wansil D. Marak na Baghmara, Dringbirik D. Sangma na Bolsong, Babulak Banai Gasuaporg bad ka Miss Sengimathi M.K. Sangma yn sa pynbna kham hadien ïa ki constituency.
Ka NCP ka la pynpaw ruh ba ka long kaba kloi ban pdiang ïa u Myntri Rangbah barim ka Jylla u Dr. Mukul A. Sangma sha ka party shwa ka elekshon ka ban long ha u snem 2028 da kaba pynpaw ba ka jingkhang jong ka party ka plie baroh 24 kynta na ka bynta ban pdiang ïa ki nongïalam kiba la tbit ban kyntiew ïa ka jylla Meghalaya.
U State President jong ka NCP, Meghalaya Unit u Omillo K. Sangma uba long ruh u MLA barim jong ka Kharkutta Constituency u la ong ba ka party ka la sdang ban pynkhlaiñ biang ïa ka party da kaba pan jingkyrshan na ki paidbah.
