Shillong, Rymphang, 16: U Lat ka Jylla Chandrashekhar H. Vijayashankar ha ka Lah Sngi u Blei u la pyntip ba ka jingsieh ïa ki mawpud ha shilynter ka khapppud jong ka Assam-Meghalaya ka la urlong hadien ka jingpyntreikam ïa ka Memorandum of Understanding (MoU) ba la ïasoi hapdeng ka Assam bad ka Meghalaya na ka bynta ki hynriew tylli ki jaka kiba don hapdeng ka jingïakajia pud.
Ka jingpynkhreh ban phiah ïa u pud u sam ka dang ïaid shakhmat, la ong u Lat haba ai jingkren sha ki dkhot jong ka Iingdorbar Thawaiñ ka Jylla ha ka sngi sdang jong ka Dorbar Mang tyngka jong u snem mang tyngka 2026-27.
U la ong ba la sieh haduh 54 tylli ki mawpud ha ka thaiñ Hahim bad 83 tylli ha ka thaiñ Gizang. U Vijayashankar u la ong shuh shuh ba ka Jylla ka la pynkhlaiñ ruh ïa ka jingpahara ha shilynter ka khappud India-Bangladesh da ka jingïatreilang bad ki shipai BSF ban pynkhlaiñ ïa ki jingsyntiat bad pynkhlaiñ ïa ka jingpahara.
Da kaba pynpaw ba ka jingthmu ba kongsan jong ka Sorkar ban pynneh ïa ka shongsuk shongsaiñ, ka jingshngaiñ bad ka bha ka miat jong ki nongshong shnong, u Lat u la ong ba ka jinglong jingman jong ka jylla ka don hapdeng ka suk ka saiñ ha kaba baroh ki tamasa, kynthup ïa ki jingrakhe hapoh ka ri bad ki tamasa ba la pynlong ha jylla ki la ïaid beit.
U la ong ba ka Sorkar ka angnud ban pynkhlaiñ ïa ka kynhun Pulit bad ka jingpynrung kam ha ki 3 hajar tylli ki kam kiba lait ka la jan dep. Ha u snem ba ladep, u Lat u la ong ba la shim ïa ki jingtyrwa bapher bapher ban pynkhlaiñ ïa ki jingtei jong ki pulit hapoh ka Police Infrastructure Renovation Fund.
U Lat u la pyntip shuh shuh ba ka jingtrei ban tei ïa ki 14 tylli ki projek shna ïing jong ki Pulit ka dang ïaid shakhmat, ka ban pynkhlaiñ ïa ka jingtreikam baroh kawei jong ka tnad Pulit ha kylleng ka Jylla.
U la ong ba ka Counter Insurgency & Jungle Warfare School ba la plie thymmai ha Baghmara ha South Garo Hills District kan nang pynkhlaiñ shuh shuh ïa ka jinglah jong ka Jylla ban pyntbit ïa ki Pulit ba kyrpang na ka bynta ban ïakhun pyrshah ïa ki kam lehnoh.
Shuh shuh u la ong ba ka jingpyntreikam ïa ki lai tylli ki aiñ pynshitom kiba thymmai, ka Bharatiya Nagrik Suraksha Sanhita, ka Bharatiya Nyaya Sanhita bad ka Bharatiya Sakshya Adhiniyam ki pynthymmai ïa ka rukom bishar ïa ki kam runar ruser ha ka Jylla.
Ki kyndon na ka bynta ki sabut digital (e-Sakshya), ki e-summon bad ki jingpynshitom kiba ïadei bad ki kam paidbah la pyntip, u la pyntip, da kaba bynrap ba la thied ïa ki kali Forensic Mobile na ka bynta ki distrik bad la ai jingmynjur ruh ïa ki kynhun Forensic ban pynkhlaiñ ïa ki jingtohkit ha manla ka distrik.
