Shillong, Rymphang, 16: Ki Pulit ka East Jaiñtia Hills District haduh mynta ki la kem 14 ngut ki briew kiba donkti ha ki kam tih dewïong beaiñ kynthup ïa ki 7 ngut kiwei pat kiba la shah kem ha ka jingbthei u bom dynamite ha ka krem tih dewïong beaiñ kaba la jia ha ka 5 tarik, Rymphang, 2026 ha ka thaiñ Mynsngat-Thangsko, East Jaiñtia Hills kaba la lam sha ka jingïap 33 ngut ki nongbylla bad bun ngut kiwei pat ki la mynsaw jur.
Ki hynñiew ngut kiba la shah kem dang shen ki long u Forme Chyrmang, u Shameki War, u Process Phawa, u Tensing Suchiang, u Yoomiki Syih, u Ernest Swer, bad u Rangsing Syiemlieh.
Ha kane ka jingjia, ki Pulit ki la ujor da ka suo-motu case ha Khliehriat Police Station hapoh ki kyndon jong ka Bharatiya Nyaya Sanhita, ka Mines and Minerals (Development and Regulation) Act, bad Explosive Substances Act.
Haba pyntip ïa kane ka jingjia ha ka sngi sdang jong ka Dorbar Mang Tyngka ka Iingdorbar Thawaiñ kaba la long ha ka Lah Sngi u Blei, u Myntri Rangbah ka jylla u Conrad K. Sangma u la ïathuh ba haduh mynta ka Sorkar Jylla ka la siew bailutksan T. 24 lak sha ki bahaiing hasem jong ki phra ngut ki nongbylla. U la pyntip ruh ba ka sokar kan sa nang pyllait shuh shuh ïa ka pisa ban siew sha ki bahaing hasem jong ki nongbylla kiba la khladnoh.
Baroh ki don 62 tylli ki ejahar ba ladep ban ujor ha ki thanat bapher bapher hapoh ka East Jaiñtia Hills ha kaba ïadei bad ka jingtih dewïong beaiñ kaba la lam sha ka jingshah kem ki 14 ngut ki briew.
Ki Pulit kiba la pynlong ka jingkhynra, ki la ïoh kurup 15,224.72 metric tonne u dewïong, 25.5 kilo ki gelatin stick, 74 tylli ki detonator bad san tylli ki kali ba la pyndonkam ha kaba tih dewïong beaiñ hapoh ka East Jaiñtia Hills District.
Nalorkata, ka tnat Pulit ka la thaw ruh ïa ka Special Investigation Team (SIT) ba la khlieh da u Deputy Inspector General (Eastern Range) ban pynlong ïa ka jingtohkit kaba bniah halor kane ka jingjia bad ka District Task Force ba la khlieh da u Deputy Commissioner ka East Jaiñtia Hills ka la peitngor bha ban pynthikna ba kan ym don shuh ka jingtih bad ka jingshalan beaiñ ïa u dewïong.
U Sangma, la ïathuh ruh khnang ban pyrkhing shuh shuh ïa ka jingtih dewïong beaiñ, la thaw ïa ka kynhun kaba kynthup ïa ki Executive Magistrate, ki Pulit, ki ophisar na ka Directorare of Mining Resources ban peitngor ïa ka jingtih dewïong beaiñ.
