Shillong, Rymphang, 18: U MDC ka Laban u Bah Ricky Shullai u la pyntip hapoh ka Ïingdorbar Thawaiñ jong ka Khasi Hills Autonomous District Council (KHADC) ba u don uwei u nongkhaii bar jylla uba la kyntait ban pdiang ïa ka Trading License ba la ai da ka KHADC bad pynskhem ba un shim beit da ka Trading License na ka Shillong Municipal Board (SMB)
U Bah Shullai u la wanrah ïa kane ka jingpyntip ha ka sngi sdang jong ka Dorbar Mang Tyngka ka KHADC kaba la long ha ka sngi Balang.
U la kyntu ruh ïa ka Executive Committee jong ka KHADC ba kan shimkhia bha halor kane namarba ka Dorbar Shnong Oxford ruh ka la phah ïa ka jingujor sha ka Council.
U CEM ka KHADC u Bah W.T Lyngdoh uba khmih ïa ka tnat Trade la pyntip hapoh ka ingdorbar ba ka Executive Committee ba mynta ka la ai 73 tylli ki Trading License ba thymmai sha ki nongkhaii bar jylla.
U la pyntip ba ki Trading License ba ka Council ka la ai sha ki bar jylla kiba leh ïa ka khaii ka pateng ha Laban Constituency ki long 5 tylli.
Ha kaba ïadei bad ka jingkyntait jong ki katto katne ki bar jylla kiba kyntait ban shim ïa ka Trading License na ka KHaDC, u Bah Lyngdoh u la ong, “haduh mynta kam pat don kano kano ka jingujor ba ka don ka jingïatakhuh hapdeng ka Municipal bad ka District Council.”
U Bah Shullai u la ïathuh ba ka Dorbar Shnong Oxford ka la phah ruh ïa ka shithi jingujor sha u kum u MDC bad sha ka District Council ba kan shimkhia halor ka jingbym pdiang jong uwei u bar jylla uba la kyntait ban shim ïa ka Trading License na ka KHADC.
Haba wanrah ïa ka jingkylli bynrap, u MDC ka Sohra u Bah Titostawell Chyne u la buh jingkylli ïa u Chief Executive Member (CEM) u Bah Winston Tony Lyngdoh ba katno ngut ki nongkhaii bar jylla kiba don ïa ka Trading License ha ka shnong Khanapara, Ribhoi District.
“Ha Ribhoi District ki Trading License ba la ai ki long 689 tylli, kiba la pynthymmai ki long 396 tylli bad kiba dang sah pongding ki long 293 tylli,” la pyntip u Bah Lyngdoh.
“Na ka bynta ka Khanapara, nga donkam ïa ka notis khnang ban wanrah hapoh ka dorbar,’ la ong shuh shuh u Bah Lyngdoh.
