Shillong, Rymphang, 21: Da ki phew hajar ngut ki paidbah na kylleng ki shnong ka rilum Khasi bad Jaiñtia ha ka sngi Saitjaiñ ki la tuid ban leit sngewlem sha ka shnong Nongsder, Ribhoi District ha ka sngi ontep ïa ka meh ba dang sah jong u MP ka Shillong Parliamentary Constituency u Dr. Ricky AJ Syngkon.
U Dr. Syngkon u la khladnoh ha ka sngi Palei ha Dr. H. Gordon Robert Hospital, Jaïaw, Shillong hadien ba u la kyllon kynsan na ka jingkyndeh shadem katba u dang ïalehkai phutbol ha Mawïong.
Ha iingsah jong u Dr. Syngkon la pynlong ïa ka jingïalang kaba lyngkot bad ka jingai khublei da ki kur ki kha, ka dorbar shnong Nongsder bad kiwei kiwei ki kynhun. Ïa ka jinglehniam la pynïaid da ka Balang Presbyterian.
Na iingsah, la rah pat ïa ka met sha madan ICAR ha Nongsder na ka bynta ka jingleh burom da ka Sorkar bad ka party VPP.
Ha ka jinglehburom, la mihkhmat ïa ka Sorkar da u Symbud Myntri Rangbah ka Jylla u Bah Sniawbhalang Dhar ryngkat ka jingsynran lang ki bor synshar ka Ribhoi District lem bad ki nongtrei bad ki nongïalam bahakhamt ka VPP ba la lamkhmat da u President u Bah Ardent Basaïawmoit.
Hadien ba la pyndep ïa ka jingleh burom la rah pat ïa ka met ba dang sah u lum jingtep ka Balang Presbyterian ha ka shnong Sumer ban tem donburom ryngkat ka jingsakhi bad ka jingsynran lang jong ki paidbah byllien.
Kiba bun ki longkmie ki la ïam paitdohnud bad kim khlem khlem da jaw ki ummat haba ki sakhi ïa kane ka sngi kaba ki pynpaw ba kim poi pyrkhat ba kin duhnoh ïa u Dr. Ricky Syngkon uba ki ñiew kum u briew uba shisur, uba kren ïa ki mat ki jura jong ka jaidbynriew ha Parliament ha kine ki ar snem mynba u dang im bad kum u nongïalap niam uba la ñiew burom da baroh.
Tang shu poi ka met jong u Dr. Syngkon ha madan ICAR, la sakhi ba la don kawei ruh ka longkmie kaba la ïam paitdohnud haduh bym tip briew shuh namarba la ban shaba palat ka jingsngewsih.
