Shillong, Rymphang, 23: Ki Pulit ka Anti Narcotic Task Force (ANTF) Meghalaya kiba la ïoh ïa ka jingtip kaba bniah na ki tnat syntait ha ka janmiet Lah Sngi u Blei ki la ïoh kurup 237 gram u drok uba la kheiñ antad ba u shongdor T.30 lak na ka ingsah jong uwei u bar jylla uba la tip kyrteng kum, u Rahul Chettri uba sah ha ka shnong Lower Rynjah, Shillong.
U Superintendent of Police (SP) ka ANTF, Meghalaya u Vikash Kumar ha ka jingkren bad ki lad pathai khubor u la ïathuh ba ha kane ka jingkhynra ki Pulit ki la ïoh kurup 23 synduk sabon u drok bad 2060 song ki dawai kuli Nitrozapam na ka ïingsah jong u Chettri.
Ha kaba ïadei bad kane ka jingjia, u SP u la ïathuh ba ki Pulit ki la kem noh ïa ki arngut kiba donkti, kata ïa ka kurim bad ïa u khun shynrang jong u Chettri.
Ha kane ka jingkhynra, ki Pulit ka ANTF kim shym la ïoh kem satia ïa u Rahul Chettri namarba u la phetrieh tang shu ïoh jingtip halor ka jingleit khynra ki Pulit ïa ka ïingsah jong u.
Nalor u drok bad ki dawai kuli Nitrazepam uba shongdor 2 hajar tyngka shi song ha ka iew die tuh ki Pulit ki la ïoh kurup ruh ïa ka pisa kaba kot 27,300 hajar.
Ïa kine ki arngut, ki Pulit ki la rah noh sha thanat na ka bynta ban pynlong shuh shuh ïa ka jingtohkit kaba bniah hapoh ki kyndon jong ka NDPS Act.
