Shillong, Rymphang, 25: Ka Nationalist Congress Party (NCP) bad ka Hynñiewtrep Integrated Territorial Organisation (HITO) ha ka sngi Balang ki la mudui da ka ejahar sha ki Pulit ka Sadar Police Station pyrshah ïa u Sunil Deodhar uba long u nongïalam jong ka RSS bad u National Secretary barim ka BJP hadien ba la saphriang ka video ba la kynnoh ba u kren ïa ki ktien kiba pharia ïa ka jaidbynriew Khasi hapdeng kiba la long Khristan bad kiba dang sah ha ka niam tynrai bad kumjuh ïa ka Sorkar.
Ha ka ejahar ka HITO ka la pynpaw ba ka jingkren jong u Deodhar ha ka video ki long kiba bakla shibun halor ka jinglong jingman jong ka histori bad ka kolshor jong ka jaitbynriew Khasi-Pnar bad ki paw ba ki thmu ban pynmih ïa ka jingïapher, khamtam eh pyrshah ïa kito kiba pynpaw ïalade kum ki Khristan.
“Ki jingkynnoh jong u ym tang ba ki ïalam bakla hynrei ki pynsngewsih jur ïa ki briew kiba la im ha ka jingburom markylliang bad ka jingïalong kawei ha la ki jong ki jingngeit. Kum u briew uba tip bha ïa ka jinghikai ba la ai ïa baroh da ki shlem pule Khristan ha kane ka thaiñ, nga shem ba kum kine ki jingkren ki long kiba pynsngewsih bad ki bym don nongrim haei haei ruh,” la pynpaw u President ka HITO Bah Donbok Dkhar ha ka ejahar.
“Ka India ka dei ka ri kaba ailad ïa ka jingmane laitluid ïa kaba la tei halor ka nongrim jong ka jingburom mar katjuh ïa baroh ki niam. Ïa ka jingsynshar paidbah jong ngi la pynskhem da ki nongïalam na ki jaitbynriew bapher bapher kiba la pynneh ïa ka jingïatylli ha ka imlang sahlang. Kano kano ka jingkren kaba pynduh ïa kane ka jingïatylli, kaba ai jingmut ban kyntait, ne kaba pynjah burom ïa ki riti jingngeit jong kiwei kam dei tang kaba pynpait pynpra hynrei ka buh jingma ïa ka shongsuk shongsaiñ ki paidbah,” la bynrap ka ejahar jong ka HITO.
“Kaba pynsngewkhia khamtam eh ka long ka jingkren jong u Deodhar shaphang ki riew pawkhmat ha ka niam, kynthup ïa U Jisu Khrist uba la mane da ki Khristan. Ka ktien kaba pynjah burom ïa ki jingngeit bakhuid ka lah ban pynmih ïa ki jingeh bad ban pynmynsaw ïa ki million ngut ki nongshong shnong kiba kohnguh ïa ka aiñ,” la bynrap shuh shuh ka ejahar.
Ka Seng ka la kyntu ïa ka tnat Pulit ban pynlong ïa ka jingtohkit katkum ki kyndon jong ka aiñ.
U State Youth President ka NCP u Bah Dapkupar Nongrum u la ong ba kum ka party ka dawa ïa ki Pulit ba ki dei ban kem mardor ïa u Sunil Deodhar bad u la ong ruh ba lada ka tnat Pulit kam leh eiei, kum ka party kan mih shakhmat ban lum paidbah ban leit pyrshah hakhmat ka ophis treikam jong ka BJP.
“U (Sunil Deodhar) u dei ban pynshai halor ka jingkren jong u bad u dei ruh ban panmap,” la ong u Bah Nongrum.
