Babu Kular Khongjirem
Tang shu bakla tiak, imat, u Chief Minister ka Meghalaya, u Conrad Sangma u lah ban poi shaduh ka jinghiar shuki syndon lada kane ka jingïakhih ha Garo Hills ka nang jur nang jur bad pur shuh shuh sa sha kiwei kiwei ki bynta jong ka Meghalaya lada kane ka sorkar MDA II hapoh ka jingïalam jong ka NPP bad UDP, bad kiwei kiwei kim lah ban tem kloi ïa kane ka jingjia bad ka jingbitar jong ki paidbah.
Ka jingïap briew ar ngut ei ei (kumba ka paw na ki lad pathai khubor) ha West Garo Hills na ka daw jong kane ka jingïakhih ka la long lypa ka jingsdang jong ka jingpynrem bad ka jingsngewsih paidbah pyrshah ïa kane ka Sorkar. Ka sorkar MDA II hapoh ka jingïalam ka party NPP ka la hap ruh ban pynsahngeh noh ïa ka Elekshon MDC ha GHADC kaba la dep rai ba kan long ha ka 10th u Ïaiong(April) mynta u snem 2026.
Kane kalong ka sien kaba nyngkong eh ha ka history jong ka jylla jong ngi ban pynsahngeh hak dak ïa ka Elekshon tang na ka daw jong ka jingïakhih paidbah. Bun ki kandidiet (candidates) kiba ladep thep kyrteng. Don ruh kiba dang mut ban thep kyrteng sa hadien shi sngi ar sngi hynrei kim lah shuh namar ba la pynsangeh (postponed) noh ïa ka elekshon.
Ka jingshah thang noh ka Office jong ka NPP ha nongbah Tura mynnin (kumba ïohi na ki media) ka la nang pynkhuslai shuh shuh ïa ka Sorkar MDA II khamtam ïa ka party NPP kaba ïalam ïa kane ka sorkar. Lada ka party NPP ka la duh mynsiem ha thymmei lajong (Garo Hills), shano pat kan leit pynthiang pynbang biang, ka shitom shibun ban leit pynbiej ha ri Khasi lait noh sa tang katto katne ha Jaiñtia Hills ba ki briew ki kwah NPP.
Mar ïa kut ka elekshon MDC ha GHADC, ka bye- elekshon MP na Shillong seat ruh kam jngai shuh sa tang hapoh 6 bnai ei ei. Baroh ar tylli ki elekshon MDC bad MP kin ktah bha ïa ki party ba ïalam ïa kane ka sorkar myntra khamtam ka party NPP.
Lada jia shisha haduh ba u Chief Minister un hiar shuki noh shisha, kaba i sheptieng eh ka long ïoh ba kane ka party ka la poi noh pynban ha kliar eh (climax) bad shen kan sa syntuid noh artad suki suki katba nangïaid ki por ki snem.
Ka jingbym lah kane ka Sorkar ban pynurlong ïa ka ILP ha Meghalaya, ka jingbym lah jong ka ban pynrung ïa ka ktien Khasi-Garo ha ka Khyrnit Baphra jong ka riti synshar ka ri India, ka jingbym lah ban jop (solved) ïa ka jingeh jong ka ishu khappud bad kiwei kiwei ki la long lypa u dak jingkylli uba heh bha ïa kane ka sorkar.
Bun ki ong ba kane ka Sorkar MDA II ba la ïalam da ka party NPP ka long ka sorkar ‘Khlein la thang jwat la bam’. Bun ruh ki ong ba ka dei ka ‘Sorkar bam hati kit kulai’ namar ka jingpynlut ka kham bun palat ban ïa ka jingïoh kamai jong ka.
Ka ktien ba ki kren sha u paidbah ka thiang palat la kum ka umngap tangba ki paidbah ki kthang hi ngang haba ki dih ne bam ïa ka. Tang ki katto katne ki nongïalam paidbah(MLA/MDC) kiba la ïoh ïa kata ka jingbam bang ka jingbam thiang bad baroh baroh ki ïa beh bad boi sha ka la kum ba boi u ngap ne u dkhiew ïa ki jingbam thiang.
Lada jia ba long elekshon thymmai leilei mynta, imat, kine ki nongïalam paidbah (MLA) kiba don sha ka liang sorkar ki lah ban shah sloit noh syndon ïa ka bor bad ka iktiar ba ki bat ha u paidbah bad shen kin sa kylla riewmadan noh.
“Ynda la sloit ïa ka iktiar, wat u Syiem ruh u kylla ‘riewmadan”.
