Babu Kular Khongjirem
Hadien ka jingïalang paidbah ba la lum bad pynlong da ka party VPP da kaba sdang napoh Motphran, Shillong bad bteng pat terter sha kylleng ki nongheh bapher bapher jong ka ri Khasi-Jaiñtia, ka la mih kawei ka rai kut jongmut na manla ki jingïalang paidbah ba ki paidbah ym shuh da ki phew hajar hynrei da ki lak ngut kin ïa mih ryntih lang ban leit tur paidbah bad kerkut syndon sha jaka treikam ka sorkar (Main Secretariat) ha kano kano ka sngi ba katei ka political party kan sa pynbeit bad buh sngi ban leit tur khnang ban ïoh pynlong kam noh ïa kito ki mat jingdawa jong ka party VPP ba ka la pashat sha ki paidbah.
Lada katei ka rai ka la long shisha ka rai rangbah (kam dei ban shu long kamkai ne shu long kam biria) bad kan urlong shisha kumba la thmu ne rai, kan don ka jingktah ïa ka sorkar MDA-2 bad ïa ka jylla Meghalaya jong ngi hi baroh kawei. Ka sorkar ka lah ban sa khyllem noh da ka bor jong ki paidbah kumba long ha ri Bangladesh, Nepal bad kiwei kiwei.
Ym tang ba ka sorkar kan sa khyllem, hynrei ki nongïalam kane ka sorkar ruh ki lah ban jah kyrteng noh syndon ha ki kam paidbah kumba phet rieh ki nongsynshar ha Bangladesh, Nepal,bad kiwei kiwei. Hynrei, namarba hangne pat ka dei ka Sorkar Jylla ka bor synshar jong ka Sorkar India ka lah ban pynjari shwa da ka President’s Rule kumba long ka jinglong ha ki jylla Manipur, tangba kane ka rukom synshar kan neh tang hapoh 6 bnai. Ka Sorkar India ka lah ban bteng biang sa 6 bnai lada ym pat lah ban thaw ïa ka Sorkar hynrei ym shuh ban bteng haduh lai sien lai wat.
Lada ka jinglong ka la kylla long shisha sha ka jinglong bym lah shuh ban tem bad ban thaw sorkar biang, ïa ka Assembly lah ban pynwai noh bad yn sa pynlong noh da ka elekshon kaba thymmai. Lada ka jia shisha kumta ba ka party VPP kan nud ban leh shisha ban leit tur sha Secretariat kumba ka la rai, kata, ka sorkar MDA-2 kan sa khyllem noh bad ka elekshon thymmai kan ym lah shuh ban ap haduh u snem 2028 hynrei ka lah ban long kloi noh malu mala ha u snem 2027.
Kata, kumba la pynbna hi da ki nongïalam ka party VPP ba ki paidbah ki la sngew slem bad sngew jlan palat ban ap ïa ka Assembly Elekshon kat haduh ban da poi u 2028 namarba ki la ngiah bad kdang hi shoin ïa ka rukom synshar jong kane ka sorkar ka bym don policy ne program bad buit thymmai hynrei da kijuh shi kijuh ki rukom pyrkhat bad da kijuh shi kijuh ki briew da ki 20 ne 30 snem mynta.
Tangba katei ka rai (resolution) kan long ruh ka jingtynjuh ïa ka party VPP. Hato, kane ka party ka lah shisha neem ban pynïatylli ïa ki paidbah ka ri Khasi-Jaiñtia kumba ka angnud? Hato, ki paidbah kin ïa mih shisha neem kumba shi lak tam eiei kumba ka thmu ka party VPP? Hato, Ynda la ïalum ha Secretariat, jop ki Pulit ne jop shisha ki paidbah ne? Hato, kat kata ka jingïakhih paidbah kaba heh bha haduh katno ngut kan jia ïa ki paidbah ba ïakhih? Hato, kaba kum kata ka jingïakhih kan wanrah shisha neem ka jingmyntoi ne kan ïalam pynban sha ka jingshah tim ïa ka jylla jong ngi?
Kine ki long tang katto katne ki jingmaham ba dei ban ïa pyrkhat lypa ba ïoh ka kylla long pynban ka jingbabe hadien ha bud.
Tangba, kito ki nongpynïaid kam sorkar kiba bat ïa ki kyrdan baheh jong ka Sorkar kum ki IAS/MCS/IPS bad kiwei kiwei (high levels) ki bym dei satia ki trai muluk bad trai jaka ki la sdang kyiuh thot thot bad peitngor bha mynta halor kane ka jinglong. Tang ka por kaba lah ban batai ïa kine kiei kiei baroh.
