Shillong, Jymmang, 14: Ka Meghalaya Pradesh Congress Committtee (MPCC) ha ka sngi Palei ka la bynshet biang ha u President ka party u Bah Vincent H. Pala ban long kum u kyrtong jong ka party ha ka elekshon MP shiteng samoi ka ban sa long shen ha Shillong Parliamentary Seat.
“Ka jingïalang ka la bynshet ha nga ban long kum u kyrtong ha ka elekshon,” la ong u Bah Pala da kaba pyntip ruh ba u la long u MP ka Shillong Parliamentary Seat la 15 snem kynthih.
“Ha Delhi nga ïohi ba donkam ïa ka party kaba heh khamtam ha kane ka kynti ka BJP ka la shna ïa ki aiñ kiba khyllah. Kawei ka aiñ kaba ma bha mynta ka long ïa ki ïingmane, ïa ki skul, ïa ki building kiba shim (jingïarap) na shabar lyngba ka FCRA, ki la pynkylla ïa ka aiñ ba lada ym pynthymmai ïa ka laisen kin sa shim noh ïa ki nongkynti, lada ym lah ban pynbiang ïa ki jingdonkam ruh kin sa shim noh ïa ki nongkynti bad lada aiti noh ïa ka laisen ruh kin sa shim noh ïa ki nongkynti,” u la ong.
“Myn ha kane, ka Congress ka la trei tyngeh bad ki paralok jong ka, la lah ban sangeh ïa kane (FCRA Amendment Bills, 2026). Kawei pat ka aiñ kaba ki thmu ban shna mynta ka long lada shiteng na ki jylla hapoh ka ri India ki shna ïa kajuh ka aiñ ka Sorkar India ruh kan hap ban bud ïa kata ka aiñ,” la ong u Bah Pala.
“Na ki 28 tylli ki jylla kiba don hapoh ka ri India mynta, 12 tylli ki jylla ki la shna ïa ka Anti-Conversion Law bad kane ka la treikam bad sah sa tang ar tylli ki ban shna. Ki jylla kiba bud, ki long ka Assam bad ka West Bengal,” la ong shuh shuh u Bah Pala.
“Nga kyrpad ïa ki nongshong shnong ka Meghalaya ba ka jingma ka don hajan bad ngim dei ban ap haduh ba kan da wan ha ngi,” la kyrpad u President ka MPCC ïa ki paidbah bad pan ruh ka jingkyrshan ïa ka Congress khnang ba kan dup lah ban ïasaid bad ïada bad ban ïakhun pyrshah ïa ka BJP.
“Ha Delhi dei tang ka Congress kaba lah ban ïakhun pyrshah ïa ka BJP hynrei ngam ong ba kiwei ruh kim pyrshah hynrei lada ki don tang uwei ne arngut ki MP kan myntoi aiu,” u la ong.
Haba ïathuh ïa ki kam ba u la leh mynba u dang long u MP ha Lok Sabha, u Bah Pala u la ong, “lada phi peit ïa ki rekod nga dei u MP uba leit tista sha Parliament bad ka Attendance Average ka long 92%, katba kiwei kiwei ki MP tang 70% ruh kim poi. Nga la ïashim 264 tylli ha ki jingkylli bad 34 sien ha ka jingïatai nia, katba kiwei pat tang 10 ne 12 sien ruh ym don ki pynmih pat ha ka social media ki ïoh jingïaroh na ki paidbah.”
“Ngi la ïakren ha ka jingïalang ba kat ki kam kiba ngi leh nangne shakhmat ngi dei ban pynmih noh ha ka social media khnang ba ki paidbah kin tip,” la ïathuh u Bah Pala.
