Shillong, Jymmang, 22: Ka Executive Committee ba ialam da ka Voice of the People Party ha Khasi Hills Autonomous District Council (KHADC) ha ka sngi Thohdieng ka la sospon ia u Syiem ka Hima Mylliem u Pa’iem Ainam Manik Syiem bad thung bujli da u Bah Alban Fedrick Syiem kum u Acting Chief ban pyniaid shipor ia ka synshar ka khadar jong ka hima.
La sospon ia u Pa’iem Ainam namarba ka ophis Hima Mylliem kam treh ban siew sha ka District Council ia ka khajna kaba 10 na ka shispah na ka jingmih jong ka.
Ha ka hukum ba la pynmih, ka District Council ka la kdew ba ka jingioh lum pisa jong ka Ophis Hima Mylliem ka long kumba T. 3 klur ha ka shisnem hynrei haba ka District Council ka pan 10 percent, ka Hima Mylliem ka la kyntait ban siew bad ka la kyrpad ban siew beit da kaba rim, kata, “one eight share” ia kaba ka District Council kam shym la mynjur satia bad la hukum ba ka ophis Hima Mylliem ka dei ban siew beit 10 percent.
Ka District Council ka la ong ba kane ka jingleh jong u Syiem ka dei ka jingpynkhein ia ki kyndon jong ka Sanad kaba la ai sha u bad ka pyni ruh ba ka don ka jingpyndonkam bakla ia ka pisa kaba dei ka bhah jong ka District Council, bad la sospon ia u Syiem katkum ka Section 7 jong ka Khasi Hills Autonomous District Appointment and Succession of Syiem, Deputy Syiem, Electors and Rangbah Shnong of Mylliem Syiemship Act 2007.
