Shillong, Jymmang, 22: U Bah Tarcisious Mawlot, ha ka sngi Thohdieng u la aiti da ka jingthoh sha u Myntri Rangbah ka Jylla u Conrad K. Sangma ban ai jingmut ha kaba iadei bad ka jingthmu jong ka Sorkar India ban khlong ia u Uranium na Domiasiat, South West Khasi Hills District.
Ha ka jingiakren bad ki lad pathai khubor, u Bah Mawlot u la ong, katkum ki dak ki shin kiba paw, ka Sorkar India ka la shna shaid shaid ia ka surok kaba pyniasoh na ka shnong Wahkali sha Chaigoan, Guwahati, Assam lyngba ka Nongstoin bad ka Rambrai. “Kane ka dei ka ishu kaba la slem bha bad ka jingtih ia u Uranium kan jia ha kano kano ka por wat hapdeng ka jingpyrshah kaba jur na ki paidbah namar ka jingsheptieng ia ka erbih,” u la ong.
“Nga iohi ba ka jingiakhih jong ngi ka don ha ka jingartatien namarba kumba nga iohi ba ka Sorkar India ka la pynlut shibun ka pisa ban shna surok naduh Domiasiat sha Assam lyngba ka Nongstoin, Rambrai bad Kyrshai. Kane ka pynidak ba ka Sorkar India kan sa tih beit ia u Uranium,” u la ong.
“Lada ka Sorkar kam don jingthmu ia kane ka projek, kan ym pynlut pisa da ki hajar klur ban shna ia ka surok. Ki don bun ki shnong kiba heh kiba donkam ban ioh ia ka surok hynrei kim pat ioh, katba kine ki shnong kiba pyniasoh surok naduh Wahkaji shaduh Chaigoan ki dei ki shnong kiba rit katba ka jingpynlut pisa na ka bynta ka surok ka long kaba jur,” la bynrap u Bah Mawlot.
U la iathuh ba ha ka jingiakynduh ia u Myntri Rangbah u la ai jingmut ba ka Sorkar kan thaw noh da ka polisi da kaba phah pule ia ki khun samla Khasi Jaintia bad Garo ia ka sobjek kaba iadei bad u Uranium, la ka long kum ki Scientist, Engineer khnang ba lada don ki briew lajong kiba trei ha ka Uranium Corporation of India Limited (UCIL) ka ban pyntreikam ia ka projek kan long ka jingshngain ia ka ri bad ka jaidbynriew.
“Lada ngi iakhih katno katno ruh, lada ka Sorkar India ka thmu ban leh da ka bor kan leh beit. Ngi la iohi khamtam ia kane ka Sorkar BJP haba ka thmu ban leh ia kano kano ka kam ka leh beit da ka bor. Lada ka buh da ki shipai lai bad saw pyrton kam myntoi shuh ban iakhih,” ong u Bah Mawlot.
U Bah Mawlot u la ong ba kane ka jingai jingmut sha u Myntri Rangbah ka dei kaba u la don lypa naduh u snem 1995 bad mynshwa ruh u la pynsngew teng ia kane ka mat hynrei ka shym la don ka jingshimkhia na ka Sorkar.
