Shillong, Jylliew, 01: Ka Jaintia Coal Owner Miners Supplier and Workers Association (JCOMSWA) ha ka Lah Sngi u Blei ka la sdang ia ka jingiakhih shah thngan ba khlem buh por ban dawa ia ka Sorkar Jylla ba kan plie noh ia ka jingtih dewïong ha rilum Jaintia.
Ia kane ka jingiakhih la pynlong hajan u durmot jong u Kiang Nangbah, ha Khliehriat East Jaintia Hills District.
U President ka seng u Bah Marshall Biam ha ka jingiakren bad ka Batesi Tv u la ong, la 12 snem tam ka Sorkar Jylla bad kumjuh ruh ka Jaintia Hills Autonomous District Council (JHADC) kim shym la wanrah ne shna kino kino ki ain kiba iadei bad ki mar pohkhyndew.
U la ong, ka seng kan pynlong ia ka jingshah thngan tad haduh ban da ioh jubab na ka Sorkar.
Hynrei ha ka por janmiet, ki Pulit ka East Jaintia Hills ki la rah bad shop lut shabar ka khyrdop kynthup ia u President ka JCOMSWA u Bah Marshall Biam bad ia ki dkhot ka seng.
Katkum ka jingtip ba la iohlum, ka JCOMSWA ka la pynlong ia ka jingiakhih hajan u durmot jong u Kiang Nangbah uba don hapoh ka phyllaw jong ka ophis u Deputy Commissioner ka East Jaintia Hills District khlem da ioh jingbit.
Hadien ba la beh lut ia ki nongiakhih ki Pulit ki la khang noh ia ka khyrdop bad pynjur ruh ia ka jingpahara ha phyllaw ka ophis u Deputy Commissioner.
