Shillong, Jylliew, 02: Ka Niam Khasi Niam Tre ka la pynpaw ka jingsngewkhia halor ki jingjia ha kine ki sngi khamtam ka jingsospon ka Khasi Hills Autonomous District Council (KHADC) ia u Syiem ba pura ka Hima Mylliem u Pa’iem Ainam Manik Syiem bad ka jingbym sanad ia u Syiem baladep jied ka Hima Sohra u Pa’iem Maremdor Syiem uba la dep ban pyndep ia ka niam iap ban thang donburom ia u Syiem ba la khlad noh jong ka Hima Sohra, u Pa’iem Freeman Sing Syiem.
Haba kren sha ki lad pathai khubor ha ka sngi Baar, hadien ba la wai ka jingiakynduh lang jong ki nongialam Niam Khasi Niamtre, u Vice President ka Seng Khasi Seng Kmie u Bah P.D Nongrum u la ong ba baroh ar ngut kine ki Syiem ki dei kiba dang bat dang ksoh ia ka niam tynrai lajong bad u la buh jingkylli da kaba ong ba hato kane ka dei kaba shu jia ryngkhat ne ka dei ka jingpyniapher niam.
Ha kaba iadei bad ka Hima Sohra u la ong ba u Pa’iem Marremdor u la pyndep ia ka niam ka rukom katkum ka riti bad la pynskhem ia u kum u Syiem bad kumba ka paw hi ka pyni ba u la dei hok ban ioh ia ka Sanad.
U Bah Nongrum u la ong ruh ba kam dei ba ka Niam Khasi Niam Tre ka kyrshan ia u Pa’iem Marremdor hynrei kam pher lada u dei u A ne u B ruh hynrei ka District Council ka dei ban pynneh ia ka riti ka dustur kumba la pynkupbor da ka Khyrnit Bahynriew jong ka riti synshar ka ri India.
Halor ka jingsospon ka KHADC ia u Pa’iem Ainam tang namarba ka Hima Mylliem kam shym la ai ia u synniang, u Bah Nongrum u la ong, “hynrei balei pat ba ha ki lai ne saw snem kita kim mih bad ka mih pynban hadien ba ka kashari ka la ai jingbit ia ki niam Khasi ban pyndep ia ka lehniam ha Lum Shyllong.”
U la buh jingkylli da kaba ong, “hato ka dei ka jingryngkhat ne don kano kano ba u (Pa’iem Aitnam) dei na ka niam tynrai.”
U la ong ruh ba dei ban sngewthuh bha ki don lai tylli ki Hima kiba la pyndep ia ka niam kata ka Hima Khyrim, ka Hima Mylliem bad ka Hima Sohra.
U la buh jingkylli ba kumno kiba la pdiang ia kiwei pat ki jait niam ki lah ban shong ha ka khet Syiem bad u la bynrap shuh shuh da kaba ong ba kane ka dei kaba ima bha ia ka jingpyrshang ban wanrah ia ka jingsngewpher niam.
