Babu Kular Khongjirem
Ha kine ki snem mynta bun ki political party ki la ïa sdang ban pyrshang ban ai hi ïa ka Report Card dalade ïalade. Kane ka long kaba bakla shibun. Kumno ki political party kin ïaroh bad ai Marks hi dalade ïalade. Ha ka jingshisha, dei kiwei ki ban bishar ïa phi bad dei ma phi pat ba phin bishar ïa kiwei. Kaba suk eh ban kdew kti ïa ka jingbakla jong kiwei, hynrei ka eh pat ban tip ne sngewthuh ïa la ka jingbakla bad ka jingduna lajong.
Hashwa ba phin lah ban jop ïa ki jingeh jong kiwei, pyntikna shwa ba phin jop shwa ïa ki jingeh lajong. Lada phi nud shisha ban ïathuh hok ïa ka jingshisha baroh, phi lah ban duh syndon noh ïa ki paralok jong phi. Ki briew kiba stad ki dap tang da ka jingartatien suda katba kiba biej pat ki dap da ka jingsngew thikna suda.
Ki political party kiba la ïoh ban bat ïa ki bor synshar la ka long ha sorkar jylla ha ki Autonomous District Council kam pher ki lah ban ai la ka jong ka report card paidbah kam pher la kumno kumno shisien shi snem khnang ba ki paidbah kin tip bad ïoh bishar ïa kaba dei ne ba lait, kaba shisha ne ka bym shisha. Ki lah ruh ban ïathuh ïa ki kam ratbah aiu ba ki la lah ban leh katkum ki mat jingkular elekshon (election manifesto) jong ki. Lada dei lei ki party kiba khuid bad shisha, ki dei ruh ban ïathuh hok lut kiei pat kita ki mat kiba kim lah satia (failed) ban pyntreikam ïa ki. Wat khlein ne thiang tang ka nia haba ki kam pat ki long sha khlaw sha btap bad sha krem sha kroh ban pynjot bad pynngam pynban ïa ka ri bad ka jaitbynriew baroh. Ki nia jong ki la kumba suh khun u lum bah lum san, hynrei ynda kha pat, kha pynban tang da u dkhan ne u khnai.
Ngi ïohi ruh ba nang bam sohphan mano, bit thit pynban shano. Teng teng, nang trei shitom u sniang, ynda ïoh nam pat, ïoh ei pynban u ksew. Ngi ïohi ba ha manla ki kam ka ka ju jia kumne wat haduh ki kam paidbah ruh. Phi kren bad sneng ïa kiwei, dei pynban ha la khoh siew lajong te. Ka mut, ba phi leh ïa lade, kynnoh bad tei pop pat ïa kiwei. Da peit shwa ïa la ka ingdong lajong hashwa ban kynnoh ïa kiwei. Ym donkam than ban da put turoi ïa lade haba ki kam pat phi la dei u nongpynjot bad u nongshukor ban pynsniew dur pynban ïa ka ri bad ka jaitbynriew lajong. Leh ïa kaba dei, ym da donkam ban da leh bha. Ym donkam ruh ban long khlein la thang bad jwat pat ynda bam. Da ïa pyrkhat bha shwa ba phin kynthih ruma-rutit .
Na ka bynta ki riew shukor, kynmaw bha ba ki sngi jong ka jingbishar (judgement) bad ki jingma bad jingshyrkhei ka la ap lypa ha ki sngi bad ki por ki ban dang wan.
