Ka thma kaba nang jur shuh shuh bad nang shyrkhei shuh shuh mynta halor ka mat jong ka jingshna ïa ka projek Ropeway ha Lum Shyllong kaba hap hapoh ka South Shillong Constituency hapoh ka jinglong MLA jong u Bah Sanbor Shullai uba bat ruh ïa ka kyrdan kum u Cabinet Minister ha ka Sorkar MDA-2 hapoh ka jylla Meghalaya hapoh ka jingïalam ka NPP.
Ka jingïalang ba khot u MLA ka South Shillong ha State Convention Centre ban ïakren bad ïatai bniah halor ka Ropeway Project ha Lum Shyllong ka la shu kut la ka kut da ka huri-hura bad khlem poi shano shano ruh.
Baroh ar mamla, kata, kiba pyrshah Ropeway hapoh ka jingïalam jong ka Joint Action Committee (JAC) bad ka kynhun kyrshan Ropeway kiba dei sha ka liang Sorkar ki la ïa pynksan ïa la ki jong ki jong ki nia.
Kano kaba dei bad kano kaba lait ym pat lah satia ban pynkut nia namar ka dang bteng ka jingïakhun jong ki. Ka ju long hi ka rukom ba kano kano ka projek kaba heh ba la leh ne plan ka Sorkar ka ju don lang beit kaba bha bad ka jingktah na kata ka jingtei ne projek.
Ka jingïapyrshah paidbah ka ju jia hi manla ki jaka kylleng ka pyrthei ym tang hangne ha ri India ne Meghalaya jong ngi. Tangba, lada ki jingpyrshah paidbah ka jop, ka Sorkar kan hap pyndem ne pynkut noh ïa kum kita ki projek. Don ruh ki projek kiba jop ka sorkar. Ka sorkar ka rat naphang lin da ki bor Pulit ne bor Shipai khlem salia shuh ïano ïano ruh. Kane ka jia kylleng ka ri India, la ha nongbah Delhi, Mumbai, Kolkata ne wat ha Assam, ka State ba don marjan bad ngi.
Hynrei kaba kham ktik eh ka dei ka kam elekshon ha Shillong South Constituency jong u Bah Sanbor Shullai. Kiba pyrshah Ropeway ki la kynther tyngeh ban pynrem elekshon noh ïa utei u local MLA jong ki bad ban ïa jied noh da uwei pat. Katba u MLA jong ki pat (Bah Sanbor Shullai) u la kren shai lyngba ki lad pathai khubor ba kane ka Ropeway project ha Lum Shyllong kan pynlong ïa u ba un nang tam bun shuh shuh lada wan ka elekshon ban jied nongmihkhmat (MLA) na katei ka Constituency.
Ka ladei ka por ban pynïaleh elekshon thamula (mock MLA election) noh mynta na katei ka South Shillong ha kane ka por khnang ba ngin ïa tip shai lang kdar ma ngi ki riew paidbah mano bajop bad mano pat ban liem ha kane ka kam.
Kiba jop ha ka elekshon thamula na katei ka Constituency ha kane ka por, kin long shisha ki nongjop ha kum kane ka mat kaba ktah mationg shisha ïa ki paidbah nongshong shnong jong ka ri bad ka jaitbynriew jong ngi.
