Shillong, Naiwieng 20: Kan long ka sien kaba nyngkong eh na ki jingiakhun kiba la long ha la ing ba ka kynhun ialehkai jong ka Shilong Lajong Football Club kan pynliem lyndang ia ka kynhun ialehkai jong ka Gokulam Kerela da 3 kol la kawei ha ka jingiakhun kaba la long ha madan ialehkai jong ka SSA Stadium, Shillong ha ka Sngi u Blei.
Hapdeng ka jingsakhi lang jong ki hajar ngut ki nongkyrshan, ka Shillong Lajong ka la ioh ban pynkhih nyngkong eh ia ka jar ha ka jingiakhun jong ka kylla step ha ka minit kaba 30 kaba la wan lyngba u Daniel Gonçalves da ka jingiarap jong u Captain u Hardy Cliff Nongbri.
Ka Gokulam kaba la iakhun tyngeh ka la ioh ban pyniakhaid ia kane ka shi kol shwa ban poi ka halftime ha ka minit kaba 43 lyngba u Nili Perdomo.
Ha ka jingiakhun ha ka kylla miet, ka Shillong Lajong ka la pynkylla ia ka rukom ialehkai bad ioh pynkhih biang ia ka jar ha ka minit kaba 75 da ka jingioh shut Penalty jong u Renan Paulino De Souza. Hapdeng ka jingiakhun kaba jwat, ka Shilllong Lajong ka la ioh ban pynkhih biang ia ka jar ha ka sien kaba lai ha ka minit kaba 98 minit lyngba u Hardy Cliff Nongbri. Da kine ki lai tylli ki kol ka la biang pura ia ka Shillong Lajong ba kan ioh khur ia ki lai point na kane ka jingiakhun kaba la buh mynta ialade ha ka kyrdan kaba hynriew ha ka miej iakhein point jong ka I-League ha kane ka aiom.
Mynta pat, ka Shillong Lajong kan hap ban pynkhreh ban iakhun pyrshah sa ia ka Delhi Football Club ka ban sa long ha ka 22 tarik u Naiwieng, 2023 ha ka por 2 baje ha madan SSA Stadium, Shillong.
