Shillong, Naiwieng 20: Ki samla pule jong ka skulbah NEHU kiba don hapoh ka shatri jong ka NEHUSU ki la dawa ia ki bor pyniaid jong kane ka skulbah ban wengkam mardor ia u Nantu Das halor ka jingkynnoh ba u donkti ban jrongkti ia kawei ka kynthei.
Ha u kyrwoh ba la phah sha ki lad pathai khubor, ka NEHUSU ka la pynbna ba kan sa pynlong ruh da ka jingiashong kyllaiñ myngngor hakhmat ka Administration Block ha ka lah sngi U Blei.
“Ngi kyrpad ia ki samla pule ba kin iasnohkti lang bad ban pynpaw ia ka jingpyrshah halor ki kam ba pynhiar dor kiba long be-aiñ. Ngi kwah ban pynpaw da kaba shai ba ngin kyntait mardor ia ka kam thombor ha ka longryngieng hapoh kane ka skulbah, bad ngin iakhun khlem da pyndem tad haduh ban da ioh ia ka hok,” ong u kyrwoh na ka NEHUSU.
“Ai ba ki bor pyniaid kin tip ba kano kano ka jingpyrshang ban iada ia u nongleh kam bymman kin sa iohi ia ka jingkhih bitar jong ki samla. Ki la pynjari korphiw ha Hostel, ki la pyrkhing ia ka iaid ka ieng laitluid da kaba kam ban wanrah ia ka jingshngaiñ, ki la pyrkhing ia ngi bad ki la teipop ia ka lanot haba ka la pyrshang ban wad ia la ka jong ka hok, hynrei ym don kawei ruh kaba lah ban pynsangeh ia ka jingshah thombor ha ka longryngieng hapoh ka Campus namarba kine ki jingpyrkhing ki long tang ban pyndik ia ki samla pule kiba luilui katba ki nonglehkam bymman ki iaid sahuh ban leh ia ki kam kiba pynisaitmet,” la ong ka NEHUSU.
“Ngi ong, lah biang katto, ngim donkam ia ka jingpyrkhing ia ki samla pule, ngim donkam ia ka dur bula jong phi kaba pynpaw ba phi sngewkhia ia ka jingshngaiñ ki kynthei, ngi dawa ban leh da kaba tyngeh ia ki nongthombor bad ngim ym ailad ia kino kino ki jingpyrshang ban iada ia ki,” la bynrap u kyrwoh na ka NEHUSU.
