Ka jingtrei shitom jong ka sorkar jylla ban pynkylluid ia ka jingiaid jong ki kali ha Shillong ka la ioh jingiaroh na ki nongbishar ba kynthup ia u Justice Sanjib Banerjee, ba dei u Chief Justice, bad u Justice W. Diengdoh, ba dei u Nongbishar jong ka High Court ka Meghalaya. Ka iingbishar ka la ong ia kane ha ka por ba dang bishar ia ka Public Interest Litigation (PIL) jong i Bah Philip Khrawbok Shati halor ka jingkhapniah ki surok ka sor Shillong ha ka sngi palei bad ka iingbishar ka la peit ruh ia kaiphot halor kane ka jingkhapniah ba la phah da ka sorkar jylla.
Ka iingbishar High Court ka la khmih bniah halor kane ka kaiphot kaba la pashat ia bun tylli ki jingai jingmut kiba kongsan, kiba long tang khyndiat por, kiba long tang shiteng por, bad kiba kham jlan halor ka jingkhapngiah ki surok iaid kali ha sor. Ka jingpyrshang jong ka sorkar jylla ban thied ia katto katne tylli ki bos ban kit ia ki khynnah skul ka la ioh jingiaroh na ka iingbishar. Haba la pyntreikam ia kane, la pyntikna ba ki kali jong ki riew shimet kim donkam shuh ban leiton lane leit shaw ia ki khynnah na ki skul. Ka iingbishar High Court ka la ithuh ia ka jingtrei shitom jong ka sorkar jylla, bad kham kyrpang eh halor ka jing kloi jong ka sorkar ban leh eiei halor kane ka kam.
Ka sor Shillong ka la iakynduh jingeh ha kaba ia dei bad ka jingkhapniah ki surok kali ha Shillong, ba khamtam ha ka por long skul bad ki ophis bad ha ka por ba la wai. Kane ka jingkhapniah ka la long kaba la tip lypa namar ba man la ka sngi kumba 13 tylli ki kali thymmai bad 14 tylli ki thuk thuk thymmai ki nang mih, kat kum ka jingtip ba la ioh na ka tnad Transport ha u snem 2021. Halor kane, kumba 60% ki khynnah skul ki pyndonkam da ki kali jong ki riew shimet ban leit sha ki skul bapher bapher.
Ban kham pynduna ia ka jingkhapngiah ha Shillong, ka Sorkar Meghalaya ka la pyllait paidbah ia ki bos banyngkong tam ha ka thain shatei lam mihngi na ka bynta ka leit ka wan ha ki jaka sor hapoh ka STEMS (Sustainable Transport and Efficient Mobility Society) haba la thied ia 30 tylli ki bos ha u bnai Kyllalyngkot, ha kaba ia kine ki bos la lah ban book lypa na ki jaka shong khamtam ia ki khynnah skul bad ki nongtrei ophis bad ruh kine ki bos ki don ia ki bor technology kum ki camera CCTV bad ka GPS-based tracking. Katkum ka jinglum jingkhein kawei ka bos ka lah ban bujil 15 tylli ki kali, kaba mut ba ha ki por ba thnem bha ka leit ka wan 30 tylli ki bos ki lah ban bujli 450 tylli ki kali. Kane kan lah ban pynduna iaka jingkhapngiah ki surok ha sor Shillong
Ka iingbishar High Court ka la ong “Kaei kaei kaba long ban ai jingiaroh ka dei ka jingkloi ban shim khia ia ka kam ha ka por kaba khim ban wanrah ia katto tylli ki bos na bynta ka jingleit on bad leit shaw ia ki khynnah skul bad ban pyntikna ba ki kali jong ki riew shimet kim donkam shuh ban leiton lane leit shaw ia ki khynnah skul na ki skul. Wat hapdeng ka jingdon ki bos skul, ki kmie ki kpa ki kham sngew tieng ia ka jingshngain ki khun jong ki khamtam ki khynnah kynthei bad ki lah ban ym shahnia ia ki ban leit da ki bos ne kali kamai wat la ka long kaba shitom ia ki kmie ki kpa”.
Ka sorkar jylla kala Kyntip ia ka high court ban shim ia kiwei kiwei ki lad ban pynduna ia ka jingdheng kali, kaba kynthup ia ka jongshna ia ki surok bathymmai, ki jaka pynieng kali, ki lynti one way bad kiwei kiwei ki kyndon”.
La pyllait paidbah ia ki bos ba hap iasam lang ha ki jaka sor na ka bynta ki nongleit nongwan da ka tnad Planning da ka jingthmu ban pynkylluid ia ki surok ha ki por long skul da 75% bad ban pynduna ia ka jingpynmih ia ka lyer CO2 da 72%.
Haba kynthoh halor ka jingithuh ka iingbishar high court, u Myntri Rangbah u Conrad K. Sangma, u la ong “Ba kum u Myntri ka tnad, nga sngewkmen ban iohi ba ka high court kala iaroh ia ka jingleh ka sorkar ban pyllait paidbah 30 tylli ki bos na ka bynta ki khynnah skul bad nongtrei ophis ha u bnai Kyllalyngkot mynta u snem. Ka jingmut ka sorkar jong ngi ban shim kabu ia ka jingiasam ia ki kali kamai ka lam sha ka jingpyntreikam ia kane ka skim ha kiba bun ki skul bad office kin iashonglang ha ki bos ba la thied da ka sorkar jylla. Ka duna bha ka jingpyndonkam ia ki bos skul, hynrei ha ka thain shatei lam mihngi, ka bos ba iasam lang jong sorkar jong ngi na ka bynta ki nongleit nongwan ha sor ka long kawei kaba nyngkong tam. Da ka jingdon ki CCTV/camera bad ki nongtrei ba la dep pynbeit, ngi khmih lynti ba kane ka rukom ym tang ba kan pynduna iaka jingdheng kali hynrei ruh yn pynthikna ia ka jingshngain jong ki khynnah kiba leit sha ki skul”.
