Shillong, Jymmang, 13: Ka Indian Institute of Management (IIT) Guwahati ka la ai jingmut ia ka Sorkar Jylla ban khlong noh ia ka rong ba la siang ha jingkieng Damsite bad ban siang bujli noh da ka dewbilat.
Ia kane la pyntip da u Myntri ka tnat Bording u Abu Taher Mondal ha ka jingiakren bad ki lad pathai khubor ha ka Lah Sngi u Blei bad iathuh ruh ba ka jingmaramot ia ka jingkieng ha Damsite ka la iaid shakhmat.
U Mondal u la iathuh ruh ba la khmihlynti ban pyndep ia ka jingshna ia ka jingkieng Damsite la kumno kumno ha kaba kut jong u bnai Naitung lane ha ka taiew banyngkong jong u bnai Nailar, mynta u snem 2024.
“Ka jingmaramot ia ka jingkieng ka la iaid shakhmat,” u la ong bad iathuh ba dang ha ka taiew baladep u la leit jngoh ia ka jingpyntrei ia ka jingkieng Dam.
“Hadien ba ngi la iasyllok bad ka IIT ka la ai jingmut ban siang noh da ka dewbilat na ki katto katne ki daw (technical reasons). Mynta ngi hap ban khlong noh ia ka rong ba ladep siang mynshwa. Ngin hap leh ia kane katkum ka jingai jingmut jong ka IIT,” u la ong.
“Ynda ngi la siang da ka dewbilat, kan kham shimpor ban rkhiang bad ngin hap ban ap sa kumba 28 sngi tad haduh ba ka dewbilat kan da rkhiang bha,” u la ong bad iathuh ba ka jingsiang ia ka dewbilat kan long shwa na kawei ka liang bad sa na kawei pat ka liang.
“Ka jingthmu hi ka long ban siang beit da ka rong bad nangta yn sa shna pyndep ia ka jingkieng. Ngi hap ban leh noh marmar namarba kane ka kam kaba kyrkieh bad ki paidbah kiba leit ba wan lyngba ka surok na ka jingkieng Damsite ki la iakynduh jingeh shikatdeh ei bad ngin pyrshang ban shna pyndep katba lah,” la bynrap u Mondal.
“Ngin pyrshang ban shna pyndep ha ka taiew bakhatduh u bnai Naitung lane ha ka taiew banyngkong u bnai Nailar,” u la ong shuh shuh.
Katkum ka jingong jong u Mondal, la khmihlynti ba ka jingkieng kan shan haduh 20 snem nangne shakhmat bad ka Sorkar kan hap ban peitngor bha ynda ladep maramot ia ka jingkieng.
Haba kylli u la iathuh ba ka Sorkar Jylla, ka tnat PWD ka la wad ruh ia ki lad ki lynti ban shna noh da ka jingkieng kaba thymmai.
“Ia ka jingpynbeit yn sa aiti sha ka NHIDCL bad kan sa shimrai khatduh halor kane,” u la ong.
