Nongpoh, Jymmang, 13: Ki bahaiing hasem jong u Bah Kyrmenskhem Lyngdoh Nonglait, 39 snem uba la khladnoh na ka jingshah tied klep, ki la kynnoh ba dei uwei u bar jylla donkti ban leh ia kane ka kam runar ha ka sngi Saitjain jong ka taiew baladep ha ka por 7:30 eiei mynmiet.
Mar ia tip ia kane ki bahaïing ki la pynkit noh ia u Bah Kyrmenskhem sha Civil Hospital Nongpoh bad hadien katto kattne por une u rangbah u la khladnoh namarba la jur palat ka jingmynsaw.
Ha ka Sngi u Blei la pynkit noh ia kamet jong une u rangbah ha NEIGHRIMS Hospital, Shillong ban leh ia ka postmortem. Une u rangbah u la ieh noh shadien saw ngut ki khun bad ia ka kurim ka Kong Esmilinda Snaitang.
Ha ka jingiakren bad u Bah Batskhem Lyngdoh Nonglait uba dei u hymmen u Kyrmenskhem Lyngdoh Nonglait u la iathuh ba u hymmen jong u la shah shoh shah tied ha ka sngi Saitjain ha uwei u bar jylla uba ki ju khot u Raju uba trei ha kawei ka hotel kaba don ha ka shnong Erpakon.
U Bah Seiborlang Lyngdoh Nonglait uba dei u Vice President jong ka kur Lyngdoh Nonglait u la pynrem jur ia kane ka jingleh jong une u bar jylla uba la bthat jubor ia ka jingim jong u Bah Kyrmenskhem bad u la kyrpad ia ki bor jong ka ain ba ka dei ban pyngngat ha ka kyndon ain kaba eh khnang ba u runar uba donkti un ioh ia ka jingshah pynsajia.
