Shillong, Nailur, 30: Ka tnat Tourism jong ka Sorkar Jylla ka la pynkupburom da ka khusnam ia ka Tourism Promoter Treking Society (TPTS) Wahkhen, ka kynhun kaba lamkhmat ban pynpawnam ia u Mawryngkhang kum ka jaka jngohkai pyrthei ha ka shnong Wahkhen tang da kaba shna ia ka lynti iaid kjat da ki siej ha shiteng riat ban sam ia ka lynti iaid ban poi sha u Mawryngkhang.
Ia ka khusnam la pynkhamti ha u Babu Kular Khongjirem da u Myntri ka tnat Tourism ha ka jingrakhe dang shen jong ka Jylla ia ka World Tourism Day ha State Convention Centre, Shillong hadien ba ka Indian Responsible Tourism ka la ithuh ia ka jingshna ba kham phylla ha ka shnong Wahkhen.
Ia kane ka lynti iaid kjat ha shiteng riat la shna da ki kti ha ka 14 tarik Kyllalyngkot, 2017 da ki katto katne ki nongshong shnong jong ka shnong Wahkhen ki riewtbit ha ki kam shna jingshna da ki siej.
Ka thong ba hakhmat eh jong kane ka Society ka long ban kyntiew ym tang ia ki kam jngohkai pyrthei ha ki jaka nongkyndong hynrei ban plie ruh ia ki lad aikam aijam na ka bynta ki nongshong shnong lyngba ki kam jngoh kai pyrthei.
Kane ka kynhun ka la bei lut nadong shadong nalade hi ia ki jinglut jingsep ban shna ia ka lynti iaid kjat da ki siej ha shiteng riat.
Ka Society kam ioh jingiarap wat shi naia ruh na ki tnat sorkar lane wat na kino kino ki nongmihkhmat ban iarap ha kaba shna bad maramot ia ka jaka jngohkai pyrthei ha shiteng riat.
Ka lynti ba la pynjingkieng da ki siej ban poi sha u Mawryngkhang ka dei kaba la shna da ki nongshong shnong kiba long ki dkhot jong ka Society ki bym don jingnang jingstad kum kita ki Engineer lane ki Architect hynrei kiba don pat ka jingtbit nalade bad kiba don ia ka sap kaba kham pher.
