Shillong, Nohprah, 23: Ka United Democratic Party (UDP) shen kan sa shim ia ka rai ha kaba iadei bad ka jingai jingkyrshan jong u MDC ka Nongkrem Constituency u Bah Lambor Malngiang ia ka Executive Committee ba la ialam da ka National Peoples Party (NPP) ha Khasi Hills Autonomous District Council (KHADC).
Ha ka jingiakren bad ki lad pathai khubor, u nongialam ka Parliamentary Party jong ka UDP u Bah Titostarwell Chyne u la iathuh ba ka Parliamentary Party ka dawa ia ki nongialam jong ka UDP ban pynshitom mardor ia u Bah Lambor Malngiang namar ka jingleh pyrshah ia ki kyndon treikam jong ka party.
“Nga dang shu dep ban phah ia ka shithi sha ka Party. Lehse hadine ka Christmas, kin sa shong ban shim ia ka rai,” la ong u Bah Titos ha ka jingiakren bad ki lad pathai khubor.
Haba kylli, u Bah Chyne u la ong ba um don jingtip eiei ruh em la kin dang don shuh shuh kiwei pat ki MDC jong ka UDP ki ban leit ai jingkyrshan ia ka EC ba mynta.
“Ki don 8 ngut ki MDC jong ka UDP. Ngam pat iohsngew eiei (ba kin leit ai jingkyrshan ia ka EC ba la ialam da ka NPP). Ha kajuh kapor, ngam pat iohsngew ba u MDC ka HSPDP u Bah Martle Mukhim, uba long ruh u Co-chairman jong ka RDA, un mih shakhmat ban leit ai jingkyrshan ia ka EC ba mynta,” u la ong da kaba bynrap ba wat u MDC Independent na Nongthymmai u Bah Latiplang Kharkongor u dang iai neh beit ha ka Liang Pyrshah.
U la ong ba u MDC ka UDP u Bah Balajied Ranee u la pynpaw ba un ai jingkyrshan beit ia ka Lineage Amendment Bill namarba u dei uwei uba ju kren bha halor ka Shaw Bhoi. “U (Bah Ranee) kyrshan i aka Bill ym ia ka EC,” u la ong.
“Watla katta, phi lah ban kylli na u Bah Balajied u don jingthmu neem ban leit pyniasoh bad kiwei pat ki party,” u la bynrap.
