Shillong, Nohprah, 23: U nongialam jong ka Liang Pyrshah ka Khasi Hills Autonomous District Council u Bah Titostarwell Chyne u la iathuh ba ka Council ka la thaw da ka Special Committee ban iathir iatai sani halor ka Khasi Hills Autonomous District (Social Custom of Clan Administration) Bill.
Ha ka jingiakren bad ki lad pathai khubor u Bah Titos u la ong ba ka Council ka la mynjur ia ka Khasi Hills Autonomous District (Khasi Social Custom of Lineage (Amendment) Bill, 2023 hadien ba la shim rai ban pynsangeh shwa ban iatai halor ka Khasi Hills Autonomous District (Social Custom of Clan Administration) Bill.
Shuh shuh u la iathuh ba ia ka Clan Bill la wanrah bad mynjur ha ka por ba u Bah HS Shylla u la long u Chief Executive Member ha u snem 2018 khnang ban pynkhlain ia ki Kur kiba don ha rilum Khasi hynrei ia kane ka Bill la pynphai biang da u Lat ka Jylla sha ka Council. Hadien ba ka executive committee bathymai ka la shimti ia u lakam synshar ha u snem 2019, la thaw ia ka special committee ba la khlieh da u Bah Bindo M. Lanong uba long u MDC Shusieh bad ka la shimpor haduh 3 snem ban iathir iatai bad ki nongialam jong ki Kur bapher bapher halor kane ka Clan Bill.
“Ha ka jingshisha, ka Lineage (Amendment) Bill ka dei tang ka kopi ba la shim na ki Clauses jong ka Clan Bill. Hynrei, kawei na ki daw kaba ngi la mynjur ia ka Amendment Bill ka long ban pynrung ia ka Shaw Bhoi ha Ri Bhoi District. Bun na ki khynnah skul kim ioh ia ki Scheduled Tribe Certificate namarba ngim pat shym la ai ia ka synot ba ki dei ki Khasi,” u la ong.
U la ai khublei ia u MDC jong ka Nongpoh Constituency u Bah Balajied Ranee uba la wanrah ia kane ka mat kaba iadei bad ka Shaw Bhoi namarba khatduh iawai la lah ban pynrung ha ka Amendment Bill ba la mynjur ha ka sngi Thohdieng.
Da kaba pynpaw ba ka Clan Bill ka kham bun ia ki bniat kiba nep ban ia ka Lineage Amendment Bill, u Bah Chyne u la ong, ba kane ka dei namarba tang ka jingthmu jong ka Clan Bill ladep pynrung ha ka Lineage Amendment Bill ka bym don satia ia ki bniat.
“Hynrei ha ka Lineage Amendment Bill ka shu long tang ban ai jingithuh ia ki Seng Kur bad ban rejistar ia ki hynrei ngim iohi ba kan don ia ka bor ban pynkupbor ia ki Seng Kur,” ula bynrap.
