Shillong, Naitung, 02: Ki nonghikai skul SSA kiba don hapoh ka shatri jong ka All Meghalaya SSA School Teachers Association (AMSSSATA) ha ka sngi Baar ki la ap da ki kynta ban ïoh ïakynduh ïa u Myntri ka tnat Puthi ka Sorkar Jylla u Rakkam A. Sangma ban pynsngew ha kaba ïadei bad ka jingdawa ban kyntiew noh ïa ka tulop jong ki nonghikai skul SSA kaba khlem pynkiew shuh mynta la phra snem kynthih.
U President jong ka Association Bah Peter Thyrniang ha ka jingïakren bad u nongthoh khubor u la ïathuh ba u Myntri u la shah skhor ïa ki jingdawa jong ka Seng bad u la kular ba un sa rah hakhmat ka Kynhun Myntri na ka bynta ban ïathir ïatai shwa ban shim ïa kano kano ka rai.
Ha ka dorkhas ba la aiti ha u Myntri, ka AMSSASTA ka la kdew ba ka jingpynkiew tulop ka la long nyngkong eh ha u snem haduh u snem 2017 bad naduh u snem 2018 ka Sorkar kam shym la pynkiew shuh ïa ka tulop jong ki nonghikai skul SSA.
“Ngi la shakri ha ki skul SSA la palat arphew snem bad ngi la noh synñiang sha u sup u thiar jong ka pule ka puthi nalor kiwei pat ki kam ba la bynshet ha ngi. Namar ka jingkiewdor jong ki marbam mardih, ngi kyrpad ban kyntiew ïa ka jingsiew tulop kaba long shispah na ka shispah,” la pynpaw ka Association ha ka dorkhas.
U Bah L. Marngar u la ïathuh ba ka Association ka la pynsngew ruh ha u Myntri ha kaba ïadei bad ka hukum jong ka Supreme Court na ka bynta ki nonghikai kiba pas ïa ka eksamin Diploma in Elementary Education ba la pynlong ha ki snem ba ladep da ka National Institute of Open Schooling ba kin ym shah ktah na kane ka hukum.
“Ki don da ki phew hajar ngut ki nonghikai SSA kiba la pyndep ïa ka eksamin D.El.Ed. ki ban shah ktah lada pyntreikam salonsar ïa ka hukum jong ka Supreme Court naduh ki snem kiba mynshwa. Ka jingkyrpad jong ngi ka long ba ka Sorkar ka pyntreikam ïa ka hukum shakhmat ym shadien,” ong u Bah Marngar.
