Khliehriat, Naitung, 12: Ki bor synshar jong ka East Jaiñtia Hills District kiba la pyntreikam ia ka hukum jong ka Iingbishar Meghalaya High Court ha ka sngi balang ki la pynpra da kaba shu pynbthei bom ia ki ar tylli ki Coke Plant ba la shna beaiñ ha East Jaiñtia Hills District.
Katkum ka kyrwoh ba la phah da u Deputy Commissioner jong ka East Jaiñtia Hills District u Abhilash Baranwal, ia ki ar tylli ki Coke Plant beaiñ lane ki karkhana sain dewiong ba la shu tei beaiñ la pynpra namar ba kim shym la ioh ia ka Consent to Establised (CTE) na ka Meghalaya State Pollution Control Board (MSPCB).
Ki ar tylli ki Coke Plant ba la shna beaiñ ki dei kiba la tip kyrteng kum ka M/s Halari Coke Plant bad ka M/s Shauryansi Coke, Wah Samsier, Elaka Sutnga. La pynpra ia ki ar tylli ki Coke Plant beaiñ hapoh ka jingpeit jong u Additional Deputy Commissioner ka East Jaintia Hills u Bah J. Shylla, kynthup ruh ki nongmihkhmat na ka ophis u Superintendent of Police ka East Jaintia Hills, na ka Meghalaya State Pollution Control Board (MSPCB) bad na ka District Commerce and Industries Centre.
Ia kine ki Coke Plant beaiñ la pynpra da kaba pynbthei da ki bom. Ia ka M/s Halari Coke Plant la pynbthei ha ka por 12:00 baje mynsngi katba ia ka M/s Shauryansi Coke, Wah Samsier, la pynbthei ha ka por 3:30 baje nohphai sngi.
Ha ka jingpynbthei ia kine ki ar tylli ki karkhana saiñ dewiong ym shym la don mano mano ruh ba mynsaw bad ka jingpynbthei ia ki Coke Plant beaiñ kan dang iai bteng.
