Shillong, Nailar, 17: Ka thaiñ Dawki kaba don ha khappud jong ka ri Bangladesh ka dei kawei na ki jaka kaba khring bha ïa ki nongjngohkai pyrthei na kylleng pyrthei namar ka jingdon jong ka wah Umngot kaba sngur khlir khlir bad ka jingdon ïa ki kshaid banoh rymphum.
Ka jingpoi jong ki nongjngohkai pyrthei sha ka thaiñ Dawki, ka la ïarap haduh katta katta ban kyntiew ïa ka ïoh ka kot jong ki nongshong shnong bad kumjuh ruh ka la plie ïa ki lad ïohkam ïohjam ïa ki paidbah ha kane ka thaiñ da ka jingdon jong ki Home Stay, ki Hotel, ki Restaurant bad kiwei kiwei de kiba ïadei bad ki kam jngohkai pyrthei.
Hynrei haba peit pat mynta ïa ka jingsniew kaba palat liam jong ka surok nalor ba ka long ruh ka surok kaba rit bad kaba khim ka la ktah haduh katta katta namarba ki nongjngokai pyrthei kim da kham leit thikna shuh sha ka thaiñ Dawki namar ka jingsniew jong ka surok.
Ka kynhun lum khubor ka la ïohlad ban ïakren bad u Waheh Shnong ka Dawki u Bah Mankhraw Ryngksai ha kaba u la ïathuh ba ka surok naduh ka thaiñ Pynursla ter ter shaduh Dawki ki la sniew palat bad kane ka dei ka dawbah kaba la pynjlep wat ïa ki nongjngohkai pyrthei ban leit sha kane ka jaka.
U Waheh Shnong jong ka shnong Dawki u la kren bynniaw ruh da kaba ong, ba ka jingbym poi thikna jong ki nongjngohkai pyrthei ka la ktah haduh katta katta ïa ki paidbah kiba im kamai jakpoh na kane ka kam.
U Bah Ryngksai, u la kyntu ïa ka Sorkar ban phah shna pyndep kham kloi ïa ka surok bad u la ïathuh ruh ba ka jingkieng Dawki ka dei kawei na ki jingkieng kiba la rim tam ha kane ka thaiñ bad mynta ka la sdang ban tor namarba ym ju don ba sumar namarba ki trok kiba kit jingkit ki ïaid lyngba na kane ka jingkieng manla ka sngi.
