Shillong, Jylliew, 06: Ki kynhun bapher bapher kiba la leit ban ai mynsiem ha ka sngi Palei ïa ka Kong Bindas Syiem kaba la shong shah thngan ha Parking Lot hajan ka ophis Additional Secretariat, Shillong ki la takraiñ tyngeh ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) kaba la leh meinah bad leh matlah ïa ka jingjot rathai jong ka surok Nongpoh-Umden-Sonapur.
U President ka HYC Bah Roy Kupar Synrem ha ka jingïakren bad ki lad pathai khubor u la ong, “kaba sngewsih ka long ba ïa kane ka surok kaba jngai kumba 58.16 kilomitar la shu ieh bein mynta da ki phew snem. Ka long kaba sngewsih ban tip ba na ki san snem sha ki san snem ki ban sa wan ki nongmihkhmat ki ïai kular bad ki ïai kren ïa ki ktien pynbiej ïa ki nongshong shnong jong ka Nongpoh Constituency. Lymda dei ba i Kong Bindas i mih shakhmat ban shah thngan sha Shillong ban pynbor ïa ka Sorkar ban shna ïa ka surok Nongpoh-Umden-Sonapur namar bun tylli ki shnong kiba shaniah ïa kane ka surok.”
“Ngi la ïoh jingtip ba ki don ki briew kiba shitom jur ha ka thaiñ ha kaba kim long shuh ban kit ha ki kali sha Nongpoh bad sha Shillong namar ka jingsniew shaba palat jong ka surok bad la shu hap ban shu kit ïa ki sha ki Hospital kiba don ha Assam,” u la ong bad bynrap, “don ruh ki khep ba ki nongshong shnong ki hap ban mad ïa ki jingjia kiba sngewsih namarba ka kali kaba ki shong ka jynjar ban pynpoi wat ha ki jaka ai jingsumar.”
“Phim dei ban sngewdiaw bad ban duh mynsiem namarba ka HYC, kan don ryngkat ha syndah jong kane ka jingïaleh jong phi,” la ai mynsiem u President ka HYC ïa ka Kong Syiem.
Haba kynthoh ïa ka Sorkar u la ong, ‘lah biang katto ka jingthok jingshukor jong phi na kawei ka por sha kawei ka por da kaba pynbiej ïa ki nongshong shnong ba luilui. Khatsan tylli ki snem phi la pynbiej ba yn shna noh ïa kane ka surok hynrei katkum ka jingïoh jingtip ba ngi ïoh wat ki kot ki sla kiba paw ka long ba wat tang ïa ka pisa ruh ym pat mang na ka bynta ban shna ïa kane ka surok. Ka jingkylli, ka long ba kaei kata ka jingkular jong phi. Phi ïoh aiu da kaba shu thok ïa ki paidbah, katba tang ka pisa ym shym la mang. Ngi pynrem jur ïa kum kine ki nongmihkhmat, ngi pynrem jur ïa ka sorkar ka bym sngap ïa ka jingud jingnam jong u paidbah.
U President ka Hynñiewtrep Integrated Territorial Organisation (HITO) Bah Donbok Dkhar ula ong, “ngi kyntu ïa ka Sorkar hapoh ka jingïalam jong u Conrad K. Sangma ba un shim ïa kane ka sienjam kaba kyrpang. Kano kano ka ishu kaba la dawa da ki nongthep vote dei ban pynbiang. Mynta ki dang wan shong hangne, peit ïoh ba kan poi ka por ba kin wan shong ha khyrdop iing jong phi.”
“Ngi kyntu ïa ka Sorkar ba kam dei shuh ban dang pynjrong ïoh ba ka ding kan nang klang. Ngi kyntu ïa u MLA (Nongpoh Constituency) ba un buddien lem ïa kane ka kam. Ngi kyntu ïa ka Sorkar ban klet noh ïa ka jingsngew politik hynrei sdang noh ïa ka lynti kaba phi dei ban ïarap,” ula ong.
U Working President ka Khun Hynñiewtrep National Awakening Movement (KHNAM) Bah Thomas Passah u la ong, “ngi hap ban kylli ïa u Myntri Rangbah, lada ka long kumne la 15 snem ïa ka Road Tax la shu shim kai.”
“Phim dei ban sngew marwei, ngi don lang ban kyrshan ïa phi nadien ha kane ka jingïaid lynti jong phi. Ngi bun ki shynrang ngi duna ki rangbah. Marwei i mih ban kren bad ban pynsngew ïa ka jingeh jong kiba bun balang. Ka surok kam dei tang ha phyllaw iing jong i hynrei ïa ka shnong baroh kawei,” ula ong.
“Ngin peit kai haduh katno sngi ba ka Sorkar kan pynshong ïa ine i kong ha surok. Ngin peitkai haduh katno ka Sorkar ka don ïa u dohnud maw. Ngi khmihlynti ba kane ka sienjam ba i kong Bindas i la shim, khamtam na Ribhoi in ïoh ïa ka jingkyrshan ha ka jingïaid lynti marwei,” u la ong.
U Finance Secretary jong ka State Executive Committee ka Voice of the People Party (VPP) Bah Danny Langstieh u la ong, “ha ka riti synshar jong ka ri India hapoh ka Article 19 (1) A, B ka shah ïano ïano ruh ban pynlong jingïakhih da ka jingjaijai khlem rah atiar.”
“La 15 snem ka la ïaid khlem shna ïa ka surok (Nongpoh-Umden-Sonapur), hynrei, dang mynta katto katne sngi, baroh ngi tip ba ka khang ka surok MES bad ka surok Goraline. Kato ka surok hapoh sor ka dei kaba dang bha hynrei ki shna pynheh na ka daw aiu ngim tip. Hynrei kine ki surok, ngam tharai ba kan sniew kumba ka long ka surok ha Umden kat haduh ba ki kali Fou Wheel ki ïaid,” la kynthoh u Bah Langstieh.
“Ha ki sngi ki ban wan, lada jia kano kano ka jingjia ba sngewsih mano ban kitkhieh. Kan kitkhlieh ka Sorkar? la buh jingkylli une u nongïalam ka VPP.
“Ngi kyrpad ïa u Deputy Commissioner ba un ai jingbit ïa i (Kong Bindas) ba in pynlong ïa ka jingïakhih pyrshah hapoh ka Article 19 (1) a, b jong ka riti synshar ka ri,” u la ong.
Ki nongshong shnong ki ïathuh ba ka kham jan ïa ki paidbah ban pynkit ïa ki nongpang na ka shnong Marmaiñ sha Assam bad ïa kaba leit kit sha Nongpoh bad sha Shillong.
