Shillong, Naitung, 14: Ki Pulit jong ka Lumdiengjri Police Station ha ka sngi thohdieng ki la khot hajir ia u Working President jong ka Hynñiewtrep National Youth Movement (HNYM) u Bah Donlang Nongbri halor ka jingkren jong u ha ka jingialang paidbah kaba la long ha ka 23 tarik Naiwieng 2022 ha ka shnong Mukroh, West Jaintia Hills District da kaba ong ban seng kynhun lehnoh hapoh ka Jylla namar ka jingbitar ïa ka sorkar jylla ka bym shym la la shimkhia ia ki jingjia ha ki shnong khappud kat haduh ba ka la wanrah ia ka jingduhei ki mynsiem briew hadien ka jingshah siat iap jong ki san ngut ki paidbah ka shnong Mukroh ha ki ktang suloi jong ki Pulit ka Jylla Assam.
Kane ka jingshah khot hajir jong u Bah Donlang Nongbri ka la jia tang hadien shitaiew tam ba u President ka seng u Bah Louis Dohtdong u la shah khot hajir ha ki Pulit jong ka Lumdiengjri Police Station halor ka jingkynnoh ba ka Secretariat ka dei ka krem ki mentuh.
Hadien ba la mih na jingshah khot hajir ha ki Pulit, u Bah Donlang ha ka jingiakren bad ki lad pathai khubor, u la kubur ba u la kren ia kine ki kyntien ba la thmu ban seng kynhun lehnoh.
“Ka dei tang ka jingkren bitar ia ka jingbym ler jong ka Sorkar Jylla bad ka tnad Pulit ban ai jingiada ia ki paidbah kiba sah ha ki shnong khappud,” u la ong.
U Bah Louis Dohtdong haba bynrap halor kane, u la ong, ka Sorkar kam dei satia ban shu pynlut kai ia ka por ban khot hajir ia ki sengbhalang sha ki Police Station hynrei ka dei ban pyndep la ka kamram da kaba phah ia ki Pulit ban ai jingiada ia ki paidbah ha ki shnong khappud kiba mad ia ki jingshah pyndik ba laiphew jait ha ki Pulit bad ha ki Karbi kiba sah ha ka Jylla Assam.
