Shillong, Nailar, 14: U State Project Ddirector Samagra Shiksha Abhiyan (SSA) u Swapnil Tembe ha ka sngi Balang u la kyntu ïa ki nongtrei SSA ba kin leit phai biang sha la ki kam namarba ka Rationalisation Committee ka la pyndep ïa ka la kamram ban pynurlong ïa ka jingdawa ban kyntiew ïa ka tulop.
Katkum ka jingong jong u, ka jingïakhih ba khlem pud sngi da ki nongtrei SSA kaba la kynjoh sha ka 15 sngi ka la ktah haduh katta katta ïa ka jingpyllait ïa ka tulop jong ki 10,000 ngut tam ki nonghikai skul SSA.
“Namar ba ka Rationalisation Committee ka la pyntyllun shakhmat ïa ka kam, ki nongtrei SSA ki dei ban leit phai biang sha ka kam bad ban bteng ïa ki kam kumba la bthah,” ong u Tembe ha u kyrwoh ba la pyllait.
U la ong, wat hapdeng kine ki jingai jingmut, ka jingïakhih kaba khlem pud sngi jong ki nongtrei ka la lam sha ka jingpynslem ban pyllait ïa ka tulop jong ki nonghikai, ban pynlong ïa ki prokram bapher bapher hapoh ka SSA bad ban pyntyllun shakhmat ïa ka Right to Education (RTE) kum ha kaba sam ïa ka uniform grant, ka library grant, ka school grants bad kiwei kiwei.
“Ki don palat 10,000 ngut ki nonghikai skul SSA ki bym pat ïoh ïa ka tulop jong u bnai Naitung haduh mynta na ka daw ka jingdon ka jingïakhih ba khlem pud sngi. Hynrei, la shim ïa ki sienjam bad ki lad ki lynti ban weng ïa ki jingeh da kaba wanrah ïa kiwei pat ki lad ki lynti,” u la ong bad bynrap, “ki nongtrei na kiwei pat ki tnat la ai jingithuh ba kin pyllait ïa ka tulop lyngba ka PFMS.”
Hynrei u la maham, ‘kane kan pynslem ban pyntreikam ïa ka pisa First Instalment ban ïoh pdiang ha kaba ïa ka pisa jong ka Second Installment yn ym pyllait satia da ka Sorkar India.
Dang shen ka Sorkar ka la mynjur ban kyntiew ïa ka jingsiew tulop kaba 25% ïa kaba la kyntait da ki nongtrei SSA bad hadien kata, ki la pynlong da ka jingïakhih ba khlem pud sngi.
Ki nongtrei SSA ki la dawa ban pynkiew ïa ka tulop kaba 80 percent.
Hynrei ka Sorkar ka la thaw da ka Rationalisation Committee ba la khlieh da u Commissioner & Secretary ka tnat Pule Puthi ba la mihkhmat ruh da ki dkhot jong ka seng ki nongtrei SSA bad la lai sien ladep shong jingïalang ban ïathir sani ïa ki jingud jingnam jong ki.
U la ong ba ka Samagra Shiksha Abhiyan State Education Mission Authority of Meghalaya (SSA-SEMAM) hapoh ka jingpeit jong ka tnad pule puthi, ka la shim katto katne ki sienjam ha kine ki snem ban ai ïa ka hok sha baroh ki nongïoh jingmyntoi bad ki nongtrei hapoh kane ka Society.
Ka imlang sahlang ka sngewkhia ïa ka bha ka miat jong ki nongtrei kynthup ïa ki nonghikai, khamtam eh halor ka jingpyllait tulop ha ka por kaba biang. Ka Society ka la shim ïa ki sienjam ban pynthikna ïa ka jingpyllait tulop ïa ki nonghikai bad ki nongtrei.
“La pynwandur biang ïa ki katto katne ki rukom treikam ban pynthikna ïa ka jingïoh pisa na ka Ministry of Education. Ka jingbuddien bad jingpeit bniah ba manla ka por ka la pynthikna ban ïoh baroh saw tylli ki Installment (pisa) bad ban pyndonkam ha u snem mang tyngka 2023-24. Ka Society ka la ïai buddien halor ka jingpynkiew tulop ïa ki nongtrei hapoh ka SSA,” u la bynrap.
