Shillong, Jylliew, 13: U Bah Joannes JTL Lamare uba long u nongtrei mon sngewbha na ka shnong Kynton-U-Mon, Nongkrem, East Khasi Hills District ha ka sngi Palei u la ujor sha ka Meghalaya Human Rights Commission (MHRC) ba kan shimkhia ha kaba ïadei bad ka jingkynnoh ba ki Pulit ka Dawki Police Station ki la phah dait da ki ksew ïa u Bah Sulin Suting hadien ba ki Pulit ki la rah ïa u sha thanat.
Ki Pulit ka Dawki Police Station ki la kem ïa u Bah Sulin Suting uba la don kumba 70 snem tam uba shong basah ha ka shnong Pyrdiwah kaba hap hapoh ka Raid Mukertilla, Pynursla Civil Sub Division ha ka 11 tarik mynta u bnai.
U Bah Joannes Lamare ha ka jingïakren bad ki lad pathai khubor, u la ïathuh ba ka Meghalaya Human Rights Commission (MHRC) ka la shim Sou Moto halor kane ka jingjia namarba ka jingpynkheiñ jong ki briew kiba bat ïa ka aiñ ïa ka hok longbriew manbriew.
Shuh shuh u la ong ba ha ka jingai jingujor sha ka Meghalaya Human Rights Commission, une u nongtrei monsngewbha u la dawa ba ki Pulit kiba donkti ha kane ka kam ki dei ban ngat ha ka jingshah pynshitom.
