Shillong, K’lyngkot 19: U MLA ka Mawlai Constituency Bah Brightstar Marbaniang hadien ka jingiatakhuh bad ki bor Pulit ha ka jingthmu ban leit tur sha Secretariat ban pynpaw ia ka jingpyrshah ia ka jingbym pyndem jong ka Sorkar Jylla ha kaba iadei bad ka jingdawa ban thung biang ia ki lain gut ki ophisar ba la weng na ka Meghalaya Lokayukta.
Ha ka jingiakren bad ki lad pathai khubor ha ka sngi Thohdieng, u Bah Bright u la pynpaw ba ia kane ka mat kin sa iakren shwa hapoh ka party bad kin sa shim ia ka rai ban leh ia kaba donkam halor ka jingiatakhuh bad ki pulit.
Shwa kane, ki nongialam ryngkat bad ki lai ngut ki MLA jong ka Voice of the People Party (VPP) ki la shah pakhang lynti ha ki Majistor bad ha ki bor Pulit katba ki dang thmu ban pynlong ia ka jingshong kyllaiñ myngngor hakhmat ka ophis Secretariat.
Ha kaba sdang u MLA ka Mawlai u Bah Brightstar Marbaniang u la shah pakhang lynti ha ki Pulit haduh ba ka la mih ka jingpyni bor bad ki Pulit. Ha kawei pat ka liang ki Pulit ki la kyndit ban iohi ba MLA ka North Shillong Constituency Bah Adelbert Nongrum u la wan poi hakhmat Secretariat lem bad ki nongialam bad na ka liang ki Majistor kiba byrngem ban thep ha bus ban kit sha Madan Malki lada u Bah Adelbert um treh ban mih nakhmat ka Secretariat.
Halor ka jingbym ailad jong ki bor pyniaid synshar District ban tur wat tang ki lai ngut ki MLA sha Secretariat, ki nongialam jong ka VPP ki hap ban shu shong harud surok mar pyrshah ka ophis Deputy Commissioner.
Ki nongialam jong ka VPP, ki la pynpaw ba kane ka dang dei tang ka jingsdang bad nangne shakhmat kin dang pynjur shuh shuh ia ki mat jingdawa kiba dei na ka jingmyntoi jong ki paidbah.
