Pakhang lynti ki Pulit ba pyni bor ki MLA bad nongkyrshan ka VPP
Shillong, K’lyngkot 19: Lai ngut ki MLA jong ka Voice of the People Party ryngkat bad ki nongkitkam kiba hakhmat jong ka party kynthup ruh ki nongkyrshan ha ka step sngi thohdieng ki la pynkheiñ ia ka Section 144 ba la pynjari da ki bor synshar ka East Khasi Hills District sawdong ka jylli jong ka Secretariat da kaba thmu ban pynlong ia ka jingiakhih da kaba shong kyllaiñ myngngor ban dawa ia ka Sorkar Meghalaya Democratic Alliance (MDA) ba la ialam da ka National Peoples Party (NPP) ba kan thung biang ia ki lai ngut ki ophisar ba la shah weng kum ki dkhot jong ka Meghalaya Lokayukta.
Lai ngut ki ophisar ba la shah wengkam ki long u Director of Inquiry and Prosecution u Bah J. Rymmai, uba dei u Ophisar IPS barim; u Enquiry-cum-Investigating Officers Bah R. Pde bad u Anil K. Sangma.
Ka NPP bad ka Sorkar ki la pynshai ba ka jingwengkam ia ki lai ngut ki ophisar ba la shongthait na ka Meghalaya Lokayukta ka dei kaba la leh katkum ki kyndon jong ka Lokayukta Act bad ia ka thup jong ki kyrteng ba thymmai ladep phah da ka Sorkar sha ka Lokayukta.
Ka mana jong ki bor synshar ka East Khasi Hills District ban khang ia ka jingiakhih paidbah hakhmat ka Secretariat ka long namar ka jingwan poi jong u Myntri ka tnat Kam Pohing ka Sorkar Pdeng u Amit Shah bad ki Myntri Rangbah jong ki jylla ka thaiñ Shatei Lammihngi ban iashim bynta ha ka jingialangbah kaba shi sngi jong ka North Eastern Council (NEC) kaba la long ha State Convention Centre, Shillong ha ka sngi Thohdieng.
Ki Majistor bad ki Pulit kiba la syrtap ia ka Secretariat ki la pakhang lynti ia ki nongialam jong ka VPP katba ki dang thmu ban tur sha Secretariat. Dei tang u MLA ka VPP na North Shillong Constituency Bah Adelbert Nongrum marwei bad ki nongsynran kiba la iohlad ban tur shakhmat Secretariat bad kane ka la pynkyndit ia ki Pulit ki bym shym la poi pyrkhat satia.
Ka kynhun ba ialam da u MLA ka Mawlai u Bah Brighstarwell Marbaniang bad u MLA ka Mawryngkneng u Bah Heavingstone Kharpran ki la shah pakhang lynti ha ki Pulit hakhmat ka ophis Deputy Commissioner.
Ka la mih ruh ka jingiapyni bor hapdeng ki Pulit bad ki MLA, ki nongialam lem bad ki nongkyrshan jong ka VPP.
Namar ka jingpyneh jong ki Magistor bad ki bor Pulit, ki MLA bad ki dkhot jong ka VPP ki la shu pynlong tang ka jingshong kyllaiñ mynngor hakhmat ka ophis Deputy Commissioner.
U Bah Brighstarwell ha ka jingiakren bad ki lad pathai khubor u la ong, katba ka Sorkar kam pat pyndem ka party kan dang iai bteng ban pynlong ia ka jingiakhih tad haduh ba kan da thungkam biang ia ki lai ngut ki Ophisar ba la shah wengkam na ka Meghalaya Lokayukta.
