Shillong, Rymphang, 22: U MLA ka Trinamool Congress na Nongthymmai u Bah Charles Pyngrope ha ka sngi palei u la kyntu ia ka Sorkar Jylla ba kan shim ia ki lad ki lynti ban pynsangeh noh mardor ia ka jingleh shiliang khmat pyrshah ia kano kano kynhun jait niam.
Haba wanrah ia ka Zero Hour notis hapoh ka Ingdorbar Thawaiñ, u Bah Pyngrope u la iathuh ba kane ka jingkyrpad jong u ka long halor ka jingjia ha kawei ka riewniam kaba la tip kyrteng kum ka Sr. Rose Mary na Siju, South Garo Hils ka la shah kren da ki ktien ba pynhiar dor bad nalor kata ka la shah pynhiar na Bos shiteng lynti ha ka jylla Assam katba ka dang mih na Duhnoi ban leit sha Goalpara.
Kane ka jingjia ka la ktah ruh ia ka jingmut jingpyrkhat pyrshah ia kane ka riewniam.
Katkum kum ka jingpyntip jong u Auxilliary Bishop ka Tura Diocese, ka Sr. Rosemary, kaba trei ha St. John Parish, Siju, South Garo Hills ka la mih na Dudhnoi sha Goalpara ha ka 17 tarik mynta u bnai bad ka la kiew da ka Bos ha ka por 11.00 baje mynstep na Dudhnoi bad siew ruh ia ka bai bos haduh Goalpara.
Hynrei tang hadien katto katne por u nongbud jong ka Bos bad ki katto katne kiba shong hapoh ka Bos ki la sdang ban kren da ki ktien ba khlemakor ia ka bad ia ka jaiñ riewniam ba ka phong bad ia ka jingngeit niam jong ki. Hadien katto katne, ki pynsangeh ia ka Bos ha kawei ka jaka ba kham kynjah bad phah hiar da ka bor na ka Bos. Kane ka jingjia ka la ktah ia ka jingmut jingpyrkhat bad shah leh bym hok jong ka Sr. Rosemary kum ka kynthei bad kum ka riewniam. Da ka jingiarap jong ki katto katne ki briew, ka Sr. Rose ka la kiew noh da kawei ka Bos ban leit sha Goalpara.
U Auxilliary Bishop u la kyntu ia ka Sorkar Jylla ba kan shimkhia mardor halor kane ka jingjia da kaba iakren bad ka Sorkar Assam khnang ba kum kine ki jingjia kin ym jia shuh hadien habud.
“Ban shu pyndik ia ki briew tang namarba ki phong ia ka riam kaba kyrpang lane ba ki phong ia ki jaiñ niam ka long kaba sngewkhia bha, ka bym pat ju ïohsngew bad kaba ym lah satia ban pdiang. Kine ki jingjia, ki jia tang namarba ka don ka jingialam bakla bad ka jingpeit shiliang khmat kaba pynsaphriang pyrshah ia kano kano ka jait niam,” u la ong bad kyrpad ia ka Sorkar ba ka dei ban shimkhia mardor ia kane ka jingjia da kaba ong, “nga sngew ba kane ka sorkar ka dei ban shim ia ki lad ki lynti ban pyrkhing bha kum ia kine ki jingpeit shiliangkhmat.”
Haba ai jubab halor kane ka jingjia, u Myntri Rangbah ka Jylla u Conrad K. Sangma u la iathuh ba u la ïoh jingtip bad mar mar u la pynsngew ia kane ka jingjia ha u Myntri Rangbah ka Jylla Assam u Himanta Biswa Sarma.
U la iathuh ruh ba ka jingïoh lum jingtip kam pat biang satia ban buddien ia kane ka kam.
“Ngi dang ap ia ka jingpyntip kaba thikna namarba ia mynta ka jingtip kaba ngi ïoh ka long ia ka tarik, ka por bad ka jaka ba ka (Sr. Rose Mary) leit jingleit, hynrei ngim pat ïoh lum jingtip u nombar kali jong ka Bos lane kano kano ka sakhi kaba pynlah ia ngi ban lapdien ia kiba donkti,” u la ong.
U la kular ruh ba un sa shimkhia bha khnang ba kum kine ki jingjia, kin ym jia shuh hadien habud ha kano kano ka bynta jong ka ri.
U Sangma u la ong ba un sa ai jubab tang shu ïoh ka jingtip kaba bniah halor kane ka jingjia.
