Shillong, Jymmang, 25: Ka Meghalaya Human Rights Commission (MHRC) ha ka sngi Saitjaiñ ka la phah da ka jingthoh sha ka Sorkar Jylla Meghalaya da kaba bthah ia u Chief Secretary ba un ai jubab halor ka jingud jingnam bad ka jingpan jingiarap jong ki briew kiba sah be-aiñ ha Lum Survey, Shillong kiba la duh noh ia ki ingtap shiliang.
Kum ban shu pyntip hangne ba kine ki briew ki la duh noh ia ki ïing shong iing sah hadien ba ki la shah lied da ka bor ha ki dkhot jong ka Hynniewtrep Youths Council ha ka 23 tarik u Jymmang, 2024 ba la lamkhmat da u President u Bah Roy Kupar Synrem.
Kane ka jingpan jubab jong ka Commission na ka Sorkar Jylla ka long hadien ba ka la shim Sou Moto lyngba ka jingthoh ba la mih ha kawei na ki lad pathai khubor ka jylla ha ka sngi Saitjaiñ.
Ha u kyrwoh ba la soi da u Secretary ka Commission ba la phah sha ki lad pathai khubor, ka Commission ka la bthah ia u Chief Secretary ba u dei ban ai ia ka jubab kaba bniah ha lane shwa ka 30 tarik u Jymmang, 2024.
Halor ka jingshah pynpra ki iing sah beaiñ jong ki poiwir ha Lum Survey ha ka step sngi Palei, ka tnat Pulit ka la register case pyrshah ïa ki heh nongïalam jong ka Hynñiewtrep Youth Council (HYC).
“Ïa ka case la rejistar ha Sadar Police Station pyrshah ïa u President ka HYC u Bah Roy Kupar Synrem, u Vice President Bah Donbok Kharlyngdoh, u Assistant General Secretary Bah Isaac Basaïawmoit bad bun ngut kiwei pat ki nongïalam bym lah ban tip kyrteng ha kaba ïadei bad ka jingleh kam be-ain jong ki ha Lum Survey ha ka step 23/05/24,” ong u Superintendent of Police ka East Khasi Hills u Rituraj Ravi.
Ki Pulit ki la pynngat ia ki nongialam bad ia ki dkhot ka HYC hapoh ka aiñ Meghalaya Maintenance of Public Order (Amendment) Act, 2010 bad hapoh ki kyndon jong ka Indian Penal Code (IPC).
