Shillong, K’lyngkot, 07: Ka Voice of the Poeple Party (VPP) ha ka sngi u Blei ka la dawa ïa ka Sorkar Meghalaya Democratic Alliance (MDA) ba la ïalam da ka National People’s Party (NPP) ba kan thungkam biang ïa ki lai ngut ki Investigating Officer jng ka ophis Lukayukta kiba la shah weng kam dang shen.
Ha u kyrwoh ba la phah sha ki lad pathai khubor u President jong ka VPP Bah Ardent M. Basaïawmoit u la ong, “ka khubor ba la mih dang shen ba ka Sorkar MDA ka la pynkut noh ïa ka samoi treikam jong ki Investigating Officers ha ka ophis jong ka State Lokayukta tang ban ïada ïa ki nongmihkhmat bamsap kiba dei na ka NPP kynthup ruh ïa ki bahaing hasem jong u Myntri Rangbah dei ban pynrem bad ban pyrshah jur da baroh ki nongshong shnong ha ka jylla.”
“U Myntri Rangbah u dei ban sangeh shisyndon ban tuklar ïa ka jingtreikam jong ka ophis jong ka Lokayukta kaba long ka shlem treikam ba laitluid bad kaba treikam khlem sheptieng. Lada kane ka sorkar ba mynta kam thungkam ïa ki ophisar ba la shah wengkam, ka party kan mih sha surok ban pynlong da ka jingïakhih pyrshah ïa ka jyrsieh bamsap jong ka Sorkar MDA ba ïalam da ka NPP,” ong u Bah Ardent.
“Ki paidbah ka Jylla Meghalaya ki deihok ban ïoh ïa ka jylla kaba lait na ka jyrsieh bamsap bad ka synshar ka khadar kaba bha. Kum ka Liang Pyrshah kaba don jingkitkhlieh, ngin pynthikna ba kane ka Sorkar kam dei ban leh ïa ki paidbah ha kane ka dur,” la ong u kyrwoh.
