Khliehriat, K’lyngkot, 07: Uwei u rangbah ïa uba la tip kyrteng kum u Bah Salbinus Dhar ba ju khot ieid kum u Bah Chiang u la duhei ïa la ka jong jingim hadien ba u la mynsaw jur na ka jingshah thombor ha ki suba Khar Bangladesh kaba la jia ha ka sngi Saitjaiñ ha ka shnong Lamasaki, East Jaiñtia Hills kaba jngai tang kumba 500 mitar na ka jaka ap ktem jong ki shipai BSF.
U Bah Rahul Pohtam na ka shnong Lumsohski uba la leit bud lang sha Bri kwai bad u Bah Chiang u la lait im da ka said na ka kti jong ki runar kiba la thombor ïa kine ki arngut katba ki dang don hapoh ka Bri ha kane ka sngi ban ap pahara ia ka bri.
Katkum ka jingïathuh jong ki trai shnong, la ong ba kine ki ar ngut ki rangbah ki la leit ban ap ïa ka bri kwai namarba ki ju don ki mynder na ka ri Bangladesh kiba ju rung sha ki bri ki bsah kiba don ha khappud ban tuh ïa u kwai na ka bri. Hynrei kine ki arngut tang shu poi ha bri kwai ki la shah kthong pynban ha ki runar kiba la wan da ka kynhun bad kiba rah ruh ïa ki tiar pynmynsaw da ki wait.
La ïathuh ruh ba kane ka kynhun runar ka la ïoh pom ïa u Bah Chiang da ka wait na ka kti ka mon, na ka khlieh bad na ryndang, katba u Bah Rahul Pohtam u la lait phet da ka said na ka kti jong ki runar.
Ka Khasi Students Union (KSU) Narpuh Circle lyngba u kyrwoh na u President Bah K.S.Suchiang ka la pynrem jur ïa kane ka kam runar bad ka kam riewkhlaw jong ki mynder kiba wan prong tuh na ka ri Bangladesh sha u pud u sam jong ka ri India bad ha kajuh ka por ka la dawa ïa ki bor ka aiñ ba ki dei ban kem mardor ïa ki runar kiba donkti ha kane ka kam runar.
Ka KSU ka la dawa ia ka Sorkar Jylla ba ka dei ban pynkynriah noh mardor ïa ki shipai BSF kiba ju pahara ha jingkieng Sonapyrdi bad ong ruh ba kane ka jingap pahara jong ki shipai BSF ka long kaba beaiñ namarba ha ka jingshisha kum shipai BSF ïada ri ki ladei ban shim khia ban tehlakam ïa ki kam sniew ha ki khappud hynrei ki ïeng pahara pynban ha surokbah National Highway-6 ha Sonapyrdi.
Ka seng ka ong ruh ba kum kine ka jingjia shah pynïap jong ki paidbah ha ki khappud ka la pynsuhjer ïa ki paradoh para snam jong ka thaiñ namarba kum kine ki jingshah thombor ki ju jia na ka por sha ka por.
Ka seng ka pynkynmaw ruh ïa kawei ka jingshah pynïap dusmon jong kawei ka longkmie kaba la 45 snem ka rta na shnong Donaskur, East Jaiñtia Hills District kaba la jia dang ha ki khyndiat bnai ba la leit ïa kaba la suba jur ba nongleh kam bymman ki dei ki mynder na ka ri Bangladesh bad ha kajuh ka por ka seng ka la kynthoh ruh ba ki bor Pulit kim pat shym la ïoh kem satia ïa ki runar kiba donkti ban pynïap dusmon ïa ka longkmie.
Shuh shuh ka seng ka la dawa ba ka Sorkar kam dei ban shu sngap jar hynrei ka dei ban shimkhia ban tehlakam ïa ki kam sniew, ki kam pyntriem ha khappud ban ïada ïa ki paradoh parasnam ban lait na kum kine ki jingshah thombor.
Ka KSU Narpuh Circle phah ruh ïa u kyrwoh sngewlem sha ki bahaïing hasem bad ka jingsngewlem halor ka jingjia ba sngewsih ïa u Bah Chiang Dhar
