Shillong, Nailur, 23: Ka tnat Transports jong ka Sorkar Jylla ka la pynkhreh shaid shaid ban shna noh la ka jong ka Meghalaya Motor Vehicle Rules (MMVR) hadien ba la pyntreikam ïa ka Rule ba la shu shim kylliang na ka Jylla Assam ïa kaba la tip kum ka Assam Motors Vehicle Rules (AMVR).
Ïa kane la pyntip da u President jong ka Hynniewtrep Integrated Territorial Organisation u Bah Donbok Dkhar ha ka jingïakren bad ki lad pathai khubor hadien ka jingïakynduh ïa u Symbud Myntri Rangbah ka Jylla uba khmih ïa ka tnat Transports u Bah Sniawbhalang Dhar ha ka Lah Sngi u Blei.
“Haduh mynta hi ka Jylla Meghalaya ka dang pyntreikam da ka Rules jong ka Jylla Assam. Katkum kane ka Rule, lada kut noh ka jingtreikam jong ka Permit, ladei ban hap pynthymmai, hynrei lada ki trai kali ki pynslem ban pynthymmai ïa ka Permit kin shah dain kuna 10 hajar tyngka,” ong u Bah Dkhar.
“Ngi sngewkhia ba u trai kali un hap ban siew haduh 10 hajar. Ngi la kyrpad ïa ka Sorkar ban pynduna noh ïa ka bai daiñ kuna bad ngi ieh ha ka jingstad jong ka Sorkar kumno ban saindur ïa kata hynrei ngi la ai jingmut ba lada u trai kali u pynslem ban pynthymmai ïa ka Permit ha ka sien kaba nyngkong ka jingdain ka dei ban long shwa tang T. 3 hajar, lada u pynslem ha ka sien kaba ar ka jingdaiñ kuna ka dei ban long T. 6 hajar bad lada pynslem ha ka sien kaba lai ka jingdaiñ kuna ka dei ban long T. 10 hajar,” ong u Bah Dkhar.
“U Symbud Myntri Rangbah u la ïathuh ba ka tnat Transports ka la pynkhreh shaid shaid ïa ka Rules khnang ban pynduna ïa ka dor shaiñ kuna. Ngi la ai jingmut katkum ka dorkhas da kaba kdew ïa ka Chapter 4,5, 7,8 bad 9 jong ka Assam Motors Vehicle Rule 2003 ba dei ban bishar bad ban pyrkhing bha ïa ka rukom daiñ kuna,” u la ong.
“Ngi la sngewdei ban pyndonkam da ka e-challan system ban siew ïa ka bai dain kuna khnang ba kan pynsuk ïa ki paidbah bad ïa ka tnat Transport namarba ngi ladep ïohi ïa ki jingjia kiba ladep,” la ong u Bah Dkhar.
U la ïathuh ba ka seng ka la kynduh ïa u Symbud Myntri Rangbah ban thaw ïa kawei ka Komiti da kaba khot lang ïa baroh ki kynhun jong ki nongñiah kali bapher bapher naduh ki Tourist, ki Agency bapher bapher ban ïasyllok kum kino ki kyndon yn thep ha ka ka Meghalaya Motor Vehicle Rules (MMVR) khnang ba kan ym don shuh kano kano ka jingbym ïasngewthuh jingmut hapdeng ki nongñiah kali Tourist na ka jylla Meghalaya bad na ka jylla Assam.
“Ngi kyrmen skhem ba kane ka Sorkar kan sa pyndep noh ïa ka jingthmu bad katkum ka jingïathuh jong u Symbud Myntri Rangbah, ka Sorkar kan leh noh wutwut ban pyndep noh ïa ka jingpynkhreh ïa ka Meghalaya Motor Vehicle Rules (MMVR),”la bynrap u Bah Dkhar.
