Shillong, Nailur, 23: Kan long ka jingkyrkhu ïa ka Shillong Lajong Football Club (SLF) hapdeng ka jingpynkhreh ïa ka lympung ïalehkai I-League jong ka samoi 2024 –2025, mynta ka kynti la soi ïa ka jingïateh kular bad ka Star Cement ka ban sa bei tyngka ïa kane ka kynhun ïalehkai ha kane ka aiom.
Ha kane ka sngi ba la ïasoi ïa ka soskular na ka liang ka Shillong Lajong Football Club la mihkhmat da u Chief Executive Officer u Bah Habamutlang Lyngdoh katba na ka Star Cement la mihkhmat da u Chief Executive Officer u Pradeep Purohit.
Ïa kane ka jingïasoi ban bei tyngka da ka Star Cement ïa ka Shillong Lajong Football Club la pynlong ha Courtyard by Mariot ha ka Lah Sngi u Blei.
Ha ka jingïakren bad Pradeep Purohit u la pynpaw ba lyngba kane ka jingbei pisa kan kyntiew ïa ka kam ïalehkai phutbol hapoh ka jylla Meghalaya bad kumjuh ruh ïa ka thaiñ Shatei lammihngi.
U Bah Habamutlang u la pynpaw ba kane ka jingbei tyngka jong ka Star Cement kan ïarap shibun eh ïa ka Club bad khamtam eh ïa ki rangïalehkai jong ka Shillong Lajong.
U la pyntip hadien ba ba ka Shillong Lajong ka la ïoh ban mihkhmat ha ka lympung ïalehkai Durand Cup, mynta ka la nang pynkhlaiñ shuh shuh ïalade da kaba thied ïa ki rangïalehkai ba thymmai bad kum ka kynhun hi ka don ïa ka jingkyrmen kaba skhem ban ïohrah ïa ka thong ha ka samoi ïalehkai I-League.
