Nongstoiñ, Nailur 22: Ka Hynñiewtrep Youths Council (HYC) West khasi Hills bad ka Dorbar Shnong Rwiang, ha ka sngi thohdieng ki la khang tala ïa ka shlem treikam jong ka karkhana Ferro Alloy kaba don ha Rwiang namar ka jingsuba shah rahbor jong kawei ka longkmie ha u nongtrei jong kane ka karkhana uba dei u bar jylla.
Ka HYC bad ka Dorbar Shnong ki la shim ïa kane ka sien jam halor ka jingjah jong kawei ka Longkmie ïa kaba la suba jur ba ka shah rahbor ha uwei u nongtrei ka karkhana.
Katkum ka tyllong khubor na ki Pulit la iathuh ba kane ka longkmie kaba la jah ka dei na ka shnong Riwiang naduh ka 16 tarik mynta u bnai. Ki Pulit ki la ïathuh ruh ba ki bahaïing hasem ki la mudui da ka ejahar halor kane ka jingjah jong kane ka longkmie.
Ki Pulit ki ïathuh ba ki bahaïing hasem ki suba jur ba kane ka longkmie ka la jah bad uwei u briew ba kyrteng u Mridul Boro, uba trei ha ka Shakhambari Ferro Alloy Company, Rwiang.
U Rangbah Shnong u la ïathuh ba ha ka 20 tarik mynta u bnai ka dorbar shnong ka leit ban khang tala ïa kane ka karkhana halor ka nongrim ba ki bor pynïaid kim shym la lah ban teh lakam ïa la ki jong ki nongtrei.
Ka dorbar shnong ka la buh kyndon ba ki bor pynïaid kim lah ban plie ïa ka karkhana, katba kim pat lah ban wan ïalam noh ïa kane ka longkmie bad ïa une u briew. Hynrei la kynnoh ba ka karkhana ka la kyndang noh ïa kane ka tala ha ka sngi kaba bud, kata ha ka 21 tarik mynta u bnai.
Hadien ba la lap ïa ka jingleh donbor jong ka kompeni, ka Dorbar Shnong ka la kyrpad ïa ka HYC West Khasi Hills ban tuklar bad ban ïarap lem ïa ka Dorbar Shnong ban khang tala ïa kane ka karkhana.
U President ka HYC Samla Lumlang Kharsyiemlieh u la ong ba ka shnong ka la kyrpad ïa ka Seng ban ïarap bad ka Seng ka ai ka jingkyrshan ba pura ïa ka Dorbar Shnong bad maham ia ka kompani ka dei ban wan ïalam shuwa ïa ka longkmie ba la jah, lym kumta kan ym ïohlad satia ban plie biang ïa ka karkhana.
Ka HYC ka la maham jur ruh ïa ki bor pynïaid ka kompeni ba kim dei ban plie ne kyndang ïa ka tala katba kim pat lah ban pynurlong ïa ki kyndon ba la buh.
