Shillong, Nailur 22: U Myntri Rangbah barim ka Jylla u Dr. Mukul Sangma ula ngat ha ka jingshah dawa ban siew bai mynraiñ khmat kaba 20 klur tyngka hadien ba u la kynnoh ia u Henry Lalremsanga ba u dei u “kingpin’ khaii drok ha ka Dorbar Synrai jong ka Iingdorbar Thaw Ain ka Jylla.
Nalor kata u Lalremsanga ha ka Legal Notice u la dawa ia u Sangma ba u dei ban panmap ruh hapoh 7 sngi
U Lalremsanga uba na Mizoram bad uba long ruh u Chairman jong ka 2B’s Group of Companies, u la dawa ia u Sangma ban siew ia kane ka bai pynmynrain bad ban panmap hapoh ka 7 sngi lem kumta un mudui da ka mukotduma Criminal bad Civil suit pyrshah ia u ha Supreme Court.
Ia ka ‘Legal notice’ la phah da u Bah K Kharmawphlang & Associates, Advocate and Legal Consultant jong u Henry Lalremsanga.
Kane ka ‘Legal Notice’ ka kdew halor ka jingkynnoh bym shong nongrim bad jingpynhiar dor ia ka longryngieng jong u Lalremsanga hapoh ka Dorbar Synrai jong ka Iingdorbar Thaw Ain bad ka jingkren sha ki lad pathai khubor kiba mih paidbah ha ka 19 tarik bad 20 tarik Nailur, 2023.
Ka Legal Notice ka la pynpaw ba kine ki jingkynnoh ki la saphriang kylleng bad la buh jingma ia u Lalremsanga shimet bad ha ki kam kiba u trei.
Shuh shuh la pynpaw ba Lalremsanga ula shah kem khlem nongrim ha u snem 2013 haba iadei bad ka jingkurup ia ki dawai ba shalan watla u don ia ka laisen ban shalan ia ki dawai. Ka Kashari Special Court NDPS Act, Patiala House Court, New Delhi ka la pynkut ia kane ka mukotduma da kaba pynskan ba ki duna shaba palat ki sakhi sabut ki ban pynshisha ia ka jingpynkheiñ aiñ jong u Lalremsanga.
Ka Legal Notice ka kdew ruh ba ka jingkynthoh pynjahburom, bym don jingpynshisha ka la pynsngewsih kthang ia u Lalremsanga, ia ka iing ka sem jong u bad ia ki kam ba u trei shabar ka ri bad kane ka jingkynthoh ka la ktah ia ka jaidbynriew Mizo hakhmat ka pyrthei bad ong ruh ba u Lalremsanga u la pynpaw ba kine ki jingshah kynnoh ba pynhiardor ki dei kiba la pynmih khnang tang ban myntoi ha ka sainpyrthei.
U Lalremsanga u la dawa ba dei ban sangeh shisyndon ban pynmih ia kino kino ki jingkren bym shonghok bad ia ki jingkynthoh ban pynjah burom ia ka longrynieng jong u.
Shuh shuh, u Legal Consultant jong u Lalremsanga u la ong ba ka ‘Legal Notice’ kan dei ka kabu bakhatduh ban pynbeit ia ki jingleh bakla kaba la pynjah burom ia ka ijot jong u.
Ha kaba iadei bad kane, u Mukul Sangma ha ka jingiakren bad ki lad pathai khubor ha ka sngi Thohdieng u la ong ba un ap ia ka Legal Notice bad un sa peit halor kaei ka kyndon ain ba la phah sha u.
“Ka jingkren jong nga hapoh ka Iingdorbar ka dei tang ka jingai jingmut ia u Myntri Rangbah hynrei dei u Myntri Rangbah uba la rah ia kane ka kam shabar jong ka Iingdorbar. Ha ka jingshisha u (Henry Lalremsanga) ladei ban phah ia ka Legal Notice sha u Myntri Rangbah,” ong u Mukul Sangma.
