Shillong, Nailar, 27: Kawei ka karkhana dieng bym pat lah satia ban tip ïa u trai jong ka karkhana ka la kylla dpei hadien ba ki thylliej ding barhem ki la bam duh ïa kane ka karkhana kaba don ha ka shnong Pohkseh East, Kyntoit Dong, Shillong.
Ka ding ka la pluh ha ka por ba kane ka karkhana ka dang khang khyrdep.
Katkum ka jingtip ba la ïohlum la ïathuh ba ka ding ka la sdang ban klang hapoh kane ka karkhana ha ka por kumba 9:00 baje mynstep.
Donbok da ka jingwan poi biang por jong ki kali pynlip ding ka tnat Fire and Emergency Services (F&ES) la lah ban tem noh ïa ka jingklang jong ki thylliej ding shwa ba ka ding kan pur sha ki iing kiba don markhap bad kane ka karkhana.
Ïa ki jingjulor jong kane ka karkhana ym pat lah satia ban ïoh jingkheiñ tad haduh ba la thoh ïa kane ka khubor.
