Shillong, Risaw, 03: U Justice Indra Prasanna Mukerji ha ka 3 tarik u Risaw, 2024 u la shimti kum u Chief Justice ba thymmai jong ka Ingbishar Meghalaya High Court hadien ba u la shah pyntian smai ha u Lat ka Jylla Meghalaya u C.H Vijayashankar ha ka jingïalang kaba la long ha Dorbar Hall jong ka Raj Bhavan.
U Justice Mukerji, u la shah thung kum u Chief Justice ba thymmai jong ka Ingbishar Meghalaya High Court ha ka Ministry of Law and Justice hadien ba la ai jingmut da ka Supreme Court Collegium.
La kha ïa u Justice Mukerji ha ka 16 tarik Nailur, 1963, na ka longing kaba la pynmih bun ngut ki riewstad aiñ bad u Justice Mukerji ruh u dei uwei uba la ngam jylliew bha ban tip shaphang ki kam jong ka aiñ.
U kpa bad u parad jong u, ki la long ki nongïasaid aiñ bad ki senior Advocate jong ka Ingbishar Calcutta High Court bad u paieid jong u u dei u senior lawyer ha Kanpur District Court. U la sdang ban trei kum u nongsaid aiñ hadien ba u la pynrung kyrteng ïalade ha ka 2 tarik, Naitung, 1990 bad u la shakri hapoh ka Ingbishar Calcutta High Court shwa ba un shah kyntiew kyrdan.
