Shillong, Naiwieng, 27: Kawei ka kudam buh tiar jong kawei ka longiing kaba don ha ka shnong Sngithiang, Lower Mawprem ka la kylla dpei hadien ba ki thylliej ding kiba klang ki la bamduh ia kane ka iing baroh kawei.
Katkum ka jingtip ba la iohlum la iathuh ba ka jingpluh jong kane ka iing ba la pynlong kudam buh tiar ka la jia ha ka lah sngi U Blei ha ka por 5:00 baje eiei mynstep na ka daw ka jingthud jong ka bording.
Ki paramarjan kiba la iohi ia ka jingklang jong ka ding ha kane ka kudam buh tiar ba la shna tang kum ka iing tap shiliang ki la pyrshang ban theh da ka um ban pynlip ia ka ding katba ki pulit kim pat poi sha kane ka jaka namar ka jingkhim shaba palat ka lynti ba ki kali Pynlip ding kin rung sha kane jaka. La iathuh ruh ba ki trai jong kane ka kudam ki dei kiba sah shapoh jong ka ing katba ka kudam kaba pluh ka dei kaba don sha ka mala kaba shajrong. Kat haduh ba la pynmih ia kane ka khubor kam shym la don satia kano kano ka jingjia ba sngewsih hynrei lait noh tang ka jingingkhong jong ki mar ki mata kiba don hapoh kane ka kukam buh tiar.
