Shillong, Naiwieng, 21: Ka Khasi Students Union (KSU) East Jaiñtia Hills District Unit ha ka sngi baar ka la kyrpad ia u Branch Manager jong ka State Bank of India (SBI) Ladrymbai Branch ba un pynshai bad pynsngewthuh ia ki paidbah hadien ba ka seng ka la ioh jingujor halor ka jingshah thok bad shah pynngop ha ka kam pisa da kaba kular ban ai nong shibun tang da ka jingsiew pisa kaba rit lyngba ki Kompeni ne ki Online Gaming, Online Trading kiba thok.
Ka seng hapoh ka jingialam jong u Asst Secretary u samla Pynshai Kupar Dkhar bad ki la iakynduh ia u Branch Manager jong ka SBI Ladrymbai ban iatrei lang bad ka seng da kaba pynlong ia ki jingpynshai paidbah halor kine ki jingshah pynngop jong ki paidbah ba luilui ka East Jaiñtia Hills District ba kynthup naduh ki khynnah skul, ki samla pule kolej, ki longkmie bad ki rangbah.
“Khnang ba kin lait na ki jingshah pynbiej ha ki kompeni, Online Earning Apps lane ki briew ba kular ban pynioh nong shiphew shah na ka jingpynlut ba khyndiat, u Branch Manager u la pdiang sngewbha ia ka jingtyrwa jong ka seng bad kular ruh ban iasnohkti lang bad ka seng ban ai jinghikai ia ki paidbah ban lait na ki riew shim kabu kiba kwah ban bam pisa ei khlem da pynmih syep ia ka pisa jong u paidbah,” la ong u kyrwoh na ka seng.
Ka KSU ka kyntu ruh kumjuh ia ki paidbah ban long kiba husiar bha ia kino kino ki jait kompeni lane ia kino kino ki briew kiba khroh ia ki ban kamai suk.
